પંજાબ ફિરોજપુરમાં પ્રધાનમંત્રીની સુરક્ષામાં ચૂકની સુપ્રીમ કોર્ટમાં સુનાવણી આજે હાથ ધરાઇ

પંજાબ ફિરોઝપુર પ્રવાસ દરમિયાન પ્રધાનમંત્રી નરેન્દ્ર મોદીની સુરક્ષા ક્ષતિના કેસમાં સુપ્રીમ કોર્ટમાં આજે સુનાવણી હાથ ધરાઈ હતી. જેમાં સુપ્રીમ કોર્ટે આ મામલે ગંભીરતા લેતા એક તપાસ કમિટી બનાવી છે. જેની અધ્યક્ષતા સુપ્રીમ કોર્ટના નિવૃત્ત જજ કરશે. આ કમિટીમાં ચંડીગઢના DG, હાઈકોર્ટના જનરલ રજિસ્ટ્રાર, NIA તથા પંજાબ પોલીસના અધિકારીઓનો પણ સમાવેશ કરવામાં આવ્યો છે. તો પંજાબ અને કેન્દ્ર સરકારે બનાવેલી કમિટી કોઈ કાર્યવાહી નહીં કરે. આ ઘટનામાં સુપ્રીમ કોર્ટ એક વિસ્તૃત આદેશ પણ પારિત કરશે. આપને જણાવી દઈએ કે વરિષ્ઠ વકીલ મનિન્દર સિંહે સુપ્રીમ કોર્ટને આ ઘટનાની તાત્કાલિક ન્યાયિક તપાસ કરવાની માંગ કરી હતી જેથી ભવિષ્યમાં આવી ભૂલો ન થાય. કોર્ટમાં દાખલ કરવામાં આવેલી અરજીમાં કહેવામાં આવ્યું છે, આ ઘટના એક ગંભીર ભૂલ છે. ભવિષ્યમાં પ્રધાનમંત્રી નરેન્દ્ર મોદીની સુરક્ષામાં કોઈ ભંગ ન થાય તે સુનિશ્ચિત કરવું જોઈએ.