આવતી કાલે પોલીસ તાલીમ શાળા વડોદરામાં તાલીમબદ્ધ ૭૮૮ મહિલા લોકરક્ષકોની પાસીંગ આઉટ પરેડ યોજાશે.

ગુજરાત વિધાનસભા અધ્યક્ષ રાજેન્દ્ર ત્રિવેદી તથા ગૃહ રાજ્યમંત્રી પ્રદિપસિંહજી જાડેજા ઉપસ્થિત રહેશે

વડોદરા પોલીસ તાલીમ શાળા ખાતે આઠ મહિનાની સઘન તાલીમ બાદ પોલીસ દળમાં જોડાવા માટે સુસજ્જ કરવામાં આવેલ ૭૮૮ મહિલા લોકરક્ષકોની પાસીંગ આઉટ પરેડ 18 માર્ચના રોજ સવારે ૮.૩૦ કલાકે ગુજરાત વિધાનસભા અધ્યક્ષ રાજેન્દ્ર ત્રિવેદી, ગૃહ રાજ્યમંત્રી પ્રદિપસિંહજી જાડેજા, ગૃહ વિભાગના અધિક મુખ્ય સચિવની ઉપસ્થિતિમાં યોજાશે. પોલીસ તાલીમ શાળાના આચાર્યા ડૉ. અર્ચના શિવહરેએ જણાવ્યું છે. અત્રે ઉલ્લેખનીય છે કે, ગુજરાતના વિવિધ ૧૪ જિલ્લાઓમાંથી પસંદગી પામેલ ૭૮૮ જેટલી બિનહથિયારી મહિલા લોકરક્ષકોને પોલીસ તાલીમ શાળા ખાતે આઠ મહિનાની તાલીમ બાદ પોલીસ દળમાં જોડાવા માટે સુસજ્જ કરવામાં આવી હોવાનું ડૉ. અર્ચના શિવહરેએ ઉમેર્યું હતું.