કમોસમી માવઠાના મારથી ખેડૂતોને સહાય: અમરેલીના ભેંકરા ગામે રાત્રે પણ ફોર્મ ભરવાની કામગીરી ચાલુ

કમોસમી માવઠાના મારથી ખેડૂતોને સહાય: અમરેલીના ભેંકરા ગામે રાત્રે પણ ફોર્મ ભરવાની કામગીરી ચાલુ

કમોસમી માવઠાના કારણે થયેલા નુકસાન બદલ સરકાર દ્વારા કૃષિ સહાય જાહેર કરવામાં આવ્યા બાદ, અમરેલી જિલ્લાના સાવરકુંડલા તાલુકાના ભેંકરા ગામે વહીવટી તંત્ર ખેડૂતોને મદદરૂપ થવા માટે રાત-દિવસ કામ કરી રહ્યું છે. જોકે, નેટ કનેક્ટિવિટીના અભાવે અને સર્વર ડાઉન રહેવાથી દિવસે ફોર્મ ભરવાની કામગીરી ધીમી પડી જાય છે.

રાત્રિના ઉજાગરા કરીને સહાય ફોર્મ ભરવાની કામગીરી

ગીરના જંગલની સરહદને અડીને આવેલા ભેંકરા ગામમાં, દિવસે સર્વરની સમસ્યાને કારણે એક ફોર્મ ભરવામાં 15 મિનિટ જેટલો સમય લાગે છે અને અચાનક સર્વર ડાઉન થતાં 'એરર' આવી જાય છે, જેનાથી ખેડૂતોની પરેશાની વધે છે.

આ સમસ્યાનો ઉકેલ લાવવા માટે, ગ્રામ પંચાયત દ્વારા રાત્રિના સમયે પણ સહાય ફોર્મ ભરવાની કામગીરી શરૂ કરવામાં આવી છે. શિયાળાની કડકડતી ઠંડીમાં પણ ખેડૂતો તાપણું કરીને VCE (વિલેજ કમ્પ્યુટર ઓપરેટર) પાસે ફોર્મ ભરવા માટે રાહ જોઈ રહ્યા છે. VCE મોડી રાત સુધી ગ્રામ પંચાયતમાં બેસીને ખેડૂતોના સહાય ફોર્મ ભરીને તેમની મુશ્કેલી પર 'મલમ રૂપી' કાર્ય કરી રહ્યા છે.

ભેંકરા ગામમાં ફોર્મ ભરવાની સ્થિતિ

ભેંકરા ગામમાં કુલ 389 જેટલા ખેડૂત ખાતેદારો છે. સરકારની જાહેરાત બાદ ગ્રામ પંચાયતોમાં સહાય ફોર્મ ભરવાની પ્રક્રિયા ચાલુ છે. કનેક્ટિવિટી અને સર્વર ડાઉનની સમસ્યા હોવા છતાં, અત્યાર સુધીમાં 100 જેટલા કૃષિ સહાય ફોર્મ ભરાઈ ચૂક્યા છે. બાકીના ખેડૂતો પણ આ કડકડતી ઠંડીમાં રાત્રે જાગીને અને તાપણું કરીને પોતાના ફોર્મ ભરાવી રહ્યા છે.

કૃષિ સહાય પેકેજ અંગે ખેડૂતોમાં થોડો અસંતોષ જોવા મળી રહ્યો છે, તેમ છતાં સરકાર દ્વારા ખેડૂતોને અગવડ ન પડે તેની તકેદારી રાખવામાં આવી રહી છે. અને ભેંકરા ગામની જેમ અનેક ગામોમાં ખેડૂતોના હિતમાં રાત્રે પણ આ કામગીરી ચાલુ રાખવામાં આવી છે.