ભરૂચની સાયખા GIDCમાં ભયાનક વિસ્ફોટ: ફાર્મા કંપની કાટમાળમાં ફેરવાઈ, 2ના મોત

ભરૂચની સાયખા GIDCમાં ભયાનક વિસ્ફોટ: ફાર્મા કંપની કાટમાળમાં ફેરવાઈ, 2ના મોત

આજરોજ (બુધવાર) વહેલી સવારે ભરૂચ જિલ્લામાં આવેલી સાયખા GIDC (ગુજરાત ઇન્ડસ્ટ્રીયલ ડેવલપમેન્ટ કોર્પોરેશન)માં એક ગંભીર દુર્ઘટના બની હતી. સાયખા GIDC સ્થિત વિશાલકરની ફાર્મા કંપનીમાં વિસ્ફોટ સાથે ભીષણ આગ ફાટી નીકળી હતી.

ભયાનક ધડાકો અને વ્યાપક નુકસાન

વિસ્ફોટ એટલો તીવ્ર હતો કે, કંપનીનો આખો પ્લાન્ટ ક્ષણવારમાં કાટમાળમાં ફેરવાઈ ગયો હતો. વિસ્ફોટનો ધડાકો આસપાસના વિસ્તારમાં દૂર સુધી સંભળાયો હતો, જેના કારણે આસપાસની અન્ય કંપનીઓના પતરા ઉડી ગયા હતા. કંપનીની નજીક રોડ પર પાર્ક કરેલું એક ટેન્કર પણ સળગી ગયું હતું.

જાનહાનિ અને શોધખોળ

આ દુર્ઘટનામાં ગંભીર જાનહાનિના સમાચાર છે, ઘટનાસ્થળે 2 કર્મચારીઓના મૃત્યુ થયા છે. આગ અને કાટમાળ વચ્ચે હજુ પણ 1 કર્મચારીની શોધખોળ ચાલી રહી છે. વિસ્ફોટ અને આગની જાણ થતાં ફાયર બ્રિગેડની ટીમો તાત્કાલિક ઘટનાસ્થળે પહોંચી હતી અને આગ પર કાબૂ મેળવવાના પ્રયાસો હાથ ધર્યા હતા.

GPSB દ્વારા તપાસ શરૂ

દુર્ઘટનાના કારણોની તપાસ શરૂ કરી દેવામાં આવી છે. ગુજરાત પ્રદૂષણ નિયંત્રણ બોર્ડ (GPSB) દ્વારા ઘટનાસ્થળના સેમ્પલ લેવામાં આવ્યા છે અને આગ તેમજ વિસ્ફોટ કયા કારણોસર થયો તેની સઘન તપાસ શરૂ કરવામાં આવી છે. સુરક્ષાના નિયમોનું પાલન થયું હતું કે કેમ, તે અંગે પણ તપાસ કરવામાં આવશે.