કેરળમાં ચોમાસાનું ધમાકેદાર આગમન: 5 જિલ્લામાં 'રેડ એલર્ટ', આગામી દિવસોમાં મુશળધાર વરસાદની ચેતવણી

કેરળમાં ચોમાસાનું ધમાકેદાર આગમન: 5 જિલ્લામાં 'રેડ એલર્ટ', આગામી દિવસોમાં મુશળધાર વરસાદની ચેતવણી

દેશમાં જેની આતુરતાથી રાહ જોવાતી હતી તે દક્ષિણપશ્ચિમ ચોમાસાનું કેરળમાં સત્તાવાર રીતે આગમન થઈ ગયું છે. ભારતીય હવામાન વિભાગ (IMD) ના જણાવ્યા અનુસાર, ચોમાસાના પ્રારંભની સાથે જ રાજ્યના ઉત્તર અને મધ્ય જિલ્લાઓમાં મેઘરાજા ધમાકેદાર બેટિંગ કરી રહ્યા છે અને ભારેથી અતિ ભારે વરસાદ નોંધાયો છે.

5 જિલ્લાઓમાં રેડ એલર્ટ, અન્ય વિસ્તારોમાં ઓરેન્જ એલર્ટ

હવામાન વિભાગે કેરળના અનેક ભાગોમાં આગામી દિવસો માટે મુશળધાર વરસાદની કડક ચેતવણી જારી કરી છે. ખાસ કરીને ઉત્તરીય જિલ્લાઓમાં ભારે આપત્તિ સર્જાવાની આશંકાને પગલે વહીવટી તંત્રને સતર્ક કરી દેવાયું છે. કાસરગોડ, કન્નુર, કોઝિકોડ, વાયનાડ અને મલપ્પુરમમાં ખૂબ જ ભારે વરસાદ માટે રેડ એલર્ટ જાહેર કરવામાં આવ્યું છે.તિરુવનંતપુરમ, કોલ્લમ અને અલાપ્પુઝા સિવાયના તમામ જિલ્લાઓમાં ઓરેન્જ એલર્ટ જાહેર કરવામાં આવ્યું છે.

દરિયાકાંઠાના વિસ્તારો અને નીચાણવાળા ભાગોમાં રહેતા લોકોને સાવચેત રહેવા અને માછીમારોને દરિયો ન ખેડવાની સલાહ આપવામાં આવી છે.

ગરમીથી મળી રાહ, તાપમાનનો પારો ગગડ્યો

ચોમાસાના આગમનને કારણે છેલ્લા ઘણા સમયથી અસહ્ય ગરમી અને બફારાનો સામનો કરી રહેલા કેરળવાસીઓને મોટી રાહત મળી છે. સમગ્ર રાજ્યમાં તાપમાન સુખદ સ્તરે નીચે આવી ગયું છે. આગામી દિવસોમાં અહીં મહત્તમ તાપમાન 28°C થી 29°C ની આસપાસ રહેવાની ધારણા છે, જેના કારણે વાતાવરણમાં ઠંડક પ્રસરી ગઈ છે.

આગામી અઠવાડિયામાં આ ચોમાસી પવનો આગળ વધીને ભારતના અન્ય રાજ્યો તરફ પ્રયાણ કરશે, જેથી મધ્ય અને ઉત્તર ભારતમાં પણ પ્રી-મોન્સૂન એક્ટિવિટી વેગ પકડી શકે છે.