પાકિસ્તાનમાં ઈંધણના ભાવમાં વધારો : પેટ્રોલ-ડીઝલમાં લિટર દીઠ રૂ.55નો ઐતિહાસિક વધારો

આર્થિક કટોકટીનો સામનો કરી રહેલા પાકિસ્તાને શુક્રવારે (6 માર્ચ) જનતા પર મોંઘવારીનો મોટો બોજ નાખ્યો છે.

ઈરાનમાં ચાલી રહેલા સંઘર્ષના કારણે આંતરરાષ્ટ્રીય બજારમાં તેલના ભાવમાં થયેલા વધારાને પગલે પાકિસ્તાન સરકારે પેટ્રોલ અને ડીઝલના ભાવમાં લગભગ 20% નો તોતિંગ વધારો થયો  છે.પેટ્રોલિયમ મંત્રી અલી પરવેઝ મલિકે એક ટેલિવિઝન સંદેશ દ્વારા ભાવ વધારાની જાહેરાત કરી હતી. તેમણે જણાવ્યું હતું કે, "વિશ્વભરમાં પેટ્રોલના ભાવમાં તીવ્ર વધારો થવાને કારણે અમે મજબૂરીમાં આ નિર્ણય લીધો છે."સરકારે ઈંધણના ભાવમાં ઐતિહાસિક રીતે લિટર દીઠ 55 રૂપિયા ($0.20) નો વધારો કર્યો છે. આ વધારા બાદ પાકિસ્તાનમાં નવી કિંમતો ડીઝલ: રૂ. 321.17 પ્રતિ લિટર,પેટ્રોલ: રૂ. 335.86 પ્રતિ લિટર છે.

આ ઐતિહાસિક વધારાના કારણે પાકિસ્તાનમાં ફુગાવો (મોંઘવારી) આસમાને પહોંચવાની શક્યતા છે, જેની સીધી અસર ગરીબ અને મધ્યમ વર્ગની જનતા પર પડશે. સ્થાનિક રહેવાસી મોહમ્મદ યુસુફે ચિંતા વ્યક્ત કરતા કહ્યું કે, "55 રૂપિયાનો વધારો માત્ર એક આંકડો નથી, તે દરેક વસ્તુને મોંઘી કરી દેશે. સામાન્ય લોકો આ સ્થિતિમાં કેવી રીતે ગુજરાન ચલાવશે?"સરકારની જાહેરાત પહેલા જ લાહોર, કરાચી અને ઈસ્લામાબાદ જેવા મુખ્ય શહેરોમાં પેટ્રોલ સ્ટેશનો પર લોકોની લાંબી લાઈનો જોવા મળી હતી. ઈસ્લામાબાદના એક પેટ્રોલ પંપ પર કામ કરતા કર્મચારી મોહમ્મદ ઝહીરે જણાવ્યું કે, "છેલ્લા બે-ત્રણ દિવસથી પેટ્રોલનો પુરવઠો આવ્યો નથી અને અડધાથી વધુ પંપો પર સ્ટોક ખલાસ થઈ ગયો છે."પાકિસ્તાન મુખ્યત્વે સાઉદી અરેબિયા અને યુએઈ (UAE) થી 'હોર્મુઝ સ્ટ્રેટ' દ્વારા તેલની આયાત કરે છે. વૈશ્વિક પરિસ્થિતિને ધ્યાનમાં રાખીને તેલ મંત્રીએ સ્પષ્ટ કર્યું છે કે સરકાર હવે સાપ્તાહિક ધોરણે ભાવનું પુનર્મૂલ્યાંકન કરશે, જેનો અર્થ છે કે આગામી દિવસોમાં પણ ભાવમાં ફેરફાર જોવા મળી શકે છે.