હોકી ઈન્ડિયાએ કોચને તાલીમ આપવા માટે બેઝિક કોર્સ શરૂ કર્યો

દેશની સર્વોચ્ચ હોકી સંસ્થા હોકી ઈન્ડિયાએ બુધવારે કોચિંગ કારકિર્દી બનાવવા માંગતા ભૂતપૂર્વ ખેલાડીઓ સહિત વ્યક્તિઓ માટે કોચિંગ લેવલનો મૂળભૂત અભ્યાસક્રમ શરૂ કરવાની જાહેરાત કરી હતી. 

આ કોર્સ હોકી ઈન્ડિયા કોચિંગ એજ્યુકેશન પાથવે ડેવલપમેન્ટ પ્રોગ્રામનો એક ભાગ છે અને તેનો હેતુ મહત્વાકાંક્ષી કોચને વિકસાવવા અને શિક્ષિત કરવાનો છે, જે તેમને FIH સ્તરના કોચિંગ અભ્યાસક્રમો તરફ આગળ વધવા માટે એક પ્લેટફોર્મ પૂરું પાડે છે.

કોચિંગ લેવલનો બેઝિક કોર્સ 24 થી 29 જૂન 2024 દરમિયાન ઓનલાઈન યોજાનાર છે અને તેમાં 40 ઉમેદવારો સાથે પાંચ બેચનો સમાવેશ થશે. ઓનલાઈન ફોર્મેટ અને કોર્સના શેડ્યૂલ અંગેની વિગતો પસંદ કરેલા સહભાગીઓને જણાવવામાં આવશે.

કોચિંગ લેવલના બેઝિક કોર્સ માટેના મુખ્ય મુદ્દા

ઉમેદવારો પાસે જિલ્લા, શાળા અથવા યુનિવર્સિટી હોકી ટીમના કોચિંગનો અગાઉનો અનુભવ હોવો જોઈએ અથવા ઓછામાં ઓછા ત્રણ વર્ષ માટે રાષ્ટ્રીય સ્તરે રમ્યો હોવો જોઈએ અથવા ઓલ ઈન્ડિયા ઈન્ટર યુનિવર્સિટી સ્તરે પ્રતિનિધિત્વ કર્યું હોવું જોઈએ.

અંગ્રેજી ભાષા પ્રાવીણ્ય - ઉમેદવારો અંગ્રેજી સમજવા અને અસરકારક રીતે વાતચીત કરવા સક્ષમ હોવા જોઈએ. અભ્યાસક્રમો ખાસ કરીને એવા કોચ અથવા સંભવિત કોચ માટે તૈયાર કરવામાં આવ્યા છે કે, જેમણે અગાઉ કોઈપણ હોકી ઈન્ડિયા સ્તરના ‘બેઝિક’ અને લેવલ ‘1’ કોચિંગ કોર્સમાં હાજરી આપી નથી.

અભ્યાસક્રમના અંતે ઓનલાઈન પરીક્ષા લેવામાં આવશે. હોકી ઇન્ડિયા લેવલ ‘1’ કોચિંગ કોર્સ માટે ક્વોલિફાય થવા માટે આ પરીક્ષા સફળતાપૂર્વક પૂર્ણ કરવી ફરજિયાત છે.

તમને જણાવી દઈએ કે, કોચિંગ કોર્સ લેવલ બેઝિક માટે ઓનલાઈન રજીસ્ટ્રેશન 15 મે, 2024 ના રોજ સવારે 10:30 વાગ્યે શરૂ થઈ ગયું છે, જે 18 મે, 2024 ના રોજ બપોરે 3:00 વાગ્યા સુધી ચાલુ રહેશે.