અમરેલીમાં ખેતીના નવા યુગનો પ્રારંભ: રાજ્યના પ્રથમ 'ખેડૂત દ્વારા આયોજિત કૃષિ મેળા'માં ટેકનોલોજી અને પરંપરાનો સંગમ

અમરેલીમાં ખેતીના નવા યુગનો પ્રારંભ: રાજ્યના પ્રથમ 'ખેડૂત દ્વારા આયોજિત કૃષિ મેળા'માં ટેકનોલોજી અને પરંપરાનો સંગમ

સૌરાષ્ટ્રના ખેતી પ્રધાન જિલ્લા અમરેલીમાં પ્રથમ વખત એક અનોખા 'કૃષિ મેળા'નું ભવ્ય આયોજન કરવામાં આવ્યું છે. આ મેળાની વિશેષતા એ છે કે તેનું આયોજન સ્વયં ખેડૂતો દ્વારા કરવામાં આવ્યું છે. ૧૧, ૧૨ અને ૧૩ એપ્રિલ દરમિયાન ચાલનારા આ ત્રિ-દિવસીય મેળાનો મુખ્ય હેતુ ખેડૂતોને આધુનિક ટેકનોલોજીથી અવગત કરાવી તેમને આર્થિક રીતે સમૃદ્ધ બનાવવાનો છે.

આ પ્રદર્શનની મુલાકાત રાજ્યના મંત્રી શ્રી કૌશિકભાઇ વેકરીયાએ લીધી હતી. આ પ્રસંગે તેમણે જણાવ્યું હતું કે, "ખેડૂતો દ્વારા જ ખેડૂતો માટે આ પ્રકારે મેળાનું આયોજન થાય તે ખૂબ જ ગૌરવની વાત છે. આવા આયોજનોથી ખેડૂતોને નવી ટેકનોલોજીની જાણકારી મળે છે અને તેઓ ઓર્ગેનિક તથા પ્રાકૃતિક ખેતી તરફ વળવા પ્રેરાય છે, જે અંતે કૃષિ ક્ષેત્રે ક્રાંતિ લાવશે."

આકર્ષણનું કેન્દ્ર: 150થી વધુ સ્ટોલ્સ અને લેટેસ્ટ ટેકનોલોજી

આ કૃષિ મેળામાં 150થી વધુ નામી-અનામી કંપનીઓએ ભાગ લીધો છે. જેમાં ટ્રેક્ટર આધારિત ઓટોમેશન સિસ્ટમ અને GPS ટેકનોલોજી, અત્યાધુનિક સીડ ડ્રિલ, રોટાવેટર અને અન્ય ડિજિટલ ખેતીના સાધનો,  ઉચ્ચ ગુણવત્તાયુક્ત બિયારણ, ખાતર અને દવાઓનું જીવંત પ્રદર્શન જેવી બાબતો ખેડૂતો માટે આકર્ષણનું કેન્દ્ર બની છે.  

ઓછા ખર્ચે વધુ ઉત્પાદનનો લક્ષ્યાંક

મેળાના આયોજકોના જણાવ્યા અનુસાર, આ માત્ર એક મેળો નથી પણ ખેડૂતો માટે એક 'કૃષિ ઉત્સવ' છે. અહીં ખેડૂતોને એક જ પ્લેટફોર્મ પરથી તમામ માહિતી મળી રહે તેવો પ્રયાસ કરાયો છે. ખાસ કરીને 'ઓછા ખર્ચે વધુ ઉત્પાદન' કેવી રીતે મેળવવું અને રાસાયણિક ખેતી છોડીને પ્રાકૃતિક ખેતી કેવી રીતે કરવી, તે અંગે નિષ્ણાતો દ્વારા માર્ગદર્શન આપવામાં આવી રહ્યું છે.

ખેડૂતોનું સન્માન

આ કાર્યક્રમ દરમિયાન કૃષિ ક્ષેત્રે ઉત્કૃષ્ટ કામગીરી કરનાર પ્રગતિશીલ ખેડૂતોનું જાહેરમાં સન્માન પણ કરવામાં આવશે, જેથી અન્ય યુવાનો પણ ખેતીમાં નવીન પ્રયોગો કરવા માટે પ્રોત્સાહિત થાય. અમરેલી જિલ્લાના ખેતીના ઇતિહાસમાં આ આયોજન એક મહત્વપૂર્ણ વળાંક સાબિત થશે, જે ખેડૂતોને વૈશ્વિક સ્તરની આધુનિક ખેતી તરફ દોરી જશે.