આરોગ્ય મંત્રી ઋષિકેશ પટેલે વડોદરા જિલ્લાની આરોગ્ય સુવિધાઓની સર્વગ્રાહી સમીક્ષા કરી સેવાઓને વધુ સુદ્રઢ કરવા આપી સૂચના

ઇમરજન્સી અને પ્રોગ્રેસિવ ટ્રિટમેન્ટ માટે હોસ્પિટલમાં ICU અને વેન્ટીલેટર વધારવા આરોગ્ય મંત્રીની તાકીદ

ગુજરાત સરકારના આરોગ્ય મંત્રી ઋષિકેશ પટેલે આજે વડોદરા SSG હોસ્પિટલ ખાતે આરોગ્ય સવલતોનું નિરીક્ષણ કરવાની સાથે જિલ્લાની આરોગ્ય સેવાઓ અને આરોગ્યલક્ષી ભૌતિક સુવિધાઓની સર્વગ્રાહી સમીક્ષા કરી હતી. સમીક્ષા બેઠકમાં આરોગ્ય મંત્રીએ સિવિલ હોસ્પિટલમાં અને જિલ્લામાં ઉપલબ્ધ આરોગ્ય સેવાઓની સમીક્ષા કરતા દર્દીઓ માટે સગવડ, સેવા અને વ્યવસ્થા કેન્દ્રમાં રાખીને સતત આરોગ્ય સેવાઓને વધુ સુદ્રઢ કરવા સંબંધિત અધિકારીઓને સૂચના આપી હતી. 

  આરોગ્ય મંત્રીએ સિવિલ હોસ્પિટલમાં સેવારત તબીબો અને આરોગ્ય કર્મીઓની હાજરી સુનિશ્ચિત કરવાની સાથે હાજરીનું સતત મોનિટરિંગ સાથે આ વ્યવસ્થાને વધુ સુદ્રઢ બનાવવા માટે તાકીદ કરી હતી. ઉપરાંત સિવિલ હોસ્પિટલમાં પીએમજેએવાયના કલેઇમ વધારવા સાથે સિવીલ હોસ્પીટલના તબીબોને ઇનેસીટીવ રકમ મળશે તેમજ રોગી કલ્યાણ સમિતિમાં પણ માતબર રકમનો વધારો થશે.જે  દર્દીઓની સેવામાં તેમજ આરોગ્યલક્ષી સાધનોની ખરીદીમાં ઉપયોગી થશે.  

આરોગ્ય મંત્રીએ સમિક્ષા બેઠકમાં પેશન્ટ એપ્રોપ્રિએટ બિહેવિયર, સમગ્ર કૅમ્પસમા એન્ટ્રી, એક્ઝીટ, ઇમરજન્સી એન્ટ્રીમાં સીસીટીવી કેમેરા અને સર્વેલન્સ વ્યવસ્થા ગોઠવવી, સિક્યુરિટી, PMJAY યોજના અને ક્લેઇમ, બ્લડ સ્ટોરેજ , આઉટસોર્સિંગ, સહિત માળખાકીય સેવા-સુવિધાઓની વિગતવાર માહિતી મેળવીને જરૂરી સૂચનાઓ આપી હતી.

SSG હોસ્પિટલ કૅમ્પસમાં GAP Analysis સર્વે કરી મહત્વના સ્થળોએ સત્વરે  CCTV કેમેરા લગાવવા મંત્રીશ્રીએ સૂચના આપી હતી.

હોસ્પિટલમાં આવતી દર્દીને બ્લડની જરૂરિયાત હોય તો સત્વરે મળી રહે તેવી વ્યવસ્થા ગોઠવવા મંત્રી શ્રીએ તાકીદ કરી હતી.

ઇમરજન્સી અને પ્રોગ્રેસિવ ટ્રિટમેન્ટ માટે હોસ્પિટલમાં ICU  અને વેન્ટીલેટર વધારવા મંત્રી શ્રી એ સૂચના આપી છે.રોગી કલ્યાણ સમીતિના માળખાને વધુ સુદ્રઢ કરીને સમયાંતરે સમીક્ષા બેઠક થાય , હોસ્પિટલમાં દવાની કોઇપણ પ્રકારની અછત વર્તાય નહીં, વર્ગ-૩ અને વર્ગ-૪ ના કર્મચારીઓની બાયોમેટ્રિક પદ્ધતિથી હાજરી લેવાય તે માટે મંત્રી શ્રીએ વિગતવાર પ્રવર્તમાન સ્થિતિની સમીક્ષા કરી જરુરી તાકીદ કરી હતી.

આરોગ્ય મંત્રીએ જિલ્લામાં ગ્રામ્ય વિસ્તારમાં પણ આરોગ્ય સેવાઓને વધુ સુદ્રઢ બનાવવા માટે આરોગ્ય કેન્દ્રો ઉપરાંત ઉપલબ્ધ મેડિકલ સાધનો અને પરિવહન માટેના વાહનોની પણ આવશ્યકતા અંગે ચર્ચા કરવામાં આવી હતી.
       
મંત્રીએ સિવિલ હોસ્પિટલની બેડની સંખ્યા, ઓ.પી.ડી. ની સંખ્યા, દવાની સ્થિતિ, માતા મરણ - બાળ મરણ, ડાયાલિસીસ વોર્ડમાં દાખલ દર્દી ની સંખ્યા, વિવિધ કામગીરીની વિગતો તેમજ શહેર તથા જિલ્લાના પી.એચ.સી. અને સી.એચ.સી. અંગેની માહિતી મેળવીને જરૂરી માર્ગદર્શન આપ્યું હતું. આ ઉપરાંત 100 દિવસ ટી. બી. કેમ્પેઈન અંગે ચાલી રહેલ ઝુંબેશ અંગે જરૂરી માહિતી મેળવી આ ઝુંબેશની અસરકારકતા ક્યાં પ્રકારની કામગીરીથી વધી શકે એ અંગે માહિતી આપી હતી. 

બેઠકમાં ધારાસભ્ય  ચૈતન્યભાઈ દેસાઇ તરફથી મળેલી રજૂઆતોના નિરાકરણ માટે પણ જરૂરી ચર્ચા કરવામાં આવી હતી. આ બેઠકમાં આરોગ્ય અને પરિવાર કલ્યાણ વિભાગના કમિશ્નર હર્ષદ પટેલ, જિલ્લા કલેકટર બી.એ.શાહ, જિલ્લા વિકાસ અધિકારી મમતા હિરપરા, શહેર ભાજપ પ્રમુખ વિજયભાઇ શાહ, સ્ટેન્ડીંગ કમિટીના ચેરમેન ડૉ.શીતલ મિસ્ત્રી, આરોગ્ય વિભાગના અધિકારીઓ, સિવિલ હોસ્પિટલના તબીબઓ સહિતના આરોગ્ય વિભાગના અધિકારીઓ ઉપસ્થિત રહ્યાં હતાં.