ઉદ્યોગ વિભાગના રાજ્યમંત્રી ડો.જયરામ ગામીત સરસાણા ખાતે 'ગ્લોબલ ફેબ્રિક એક્સ્પો-2026'ને ખુલ્લુ મૂક્યુ

સધર્ન ગુજરાત ચેમ્બર ઓફ કોમર્સ એન્ડ ઇન્ડસ્ટ્રીઝ અને સાઉથ ગુજરાત ચેમ્બર ટ્રેડ એન્ડ ઇન્ડસ્ટ્રીઝ ડેવલપમેન્ટ સેન્ટરના સંયુક્ત ઉપક્રમે સુરત ઇન્ટરનેશનલ એક્ઝિબિશન એન્ડ કન્વેન્શન સેન્ટર-સરસાણા ખાતે આયોજિત ‘ગ્લોબલ ફેબ્રિક એક્સ્પો-2026’ને રમતગમત, યુવક સેવા અને સાંસ્કૃતિક પ્રવૃત્તિઓ, ઉદ્યોગ વિભાગના રાજ્યમંત્રી ડો.જયરામ ગામીતના હસ્તે ખુલ્લો મૂકવામાં આવ્યો હતો.

તેમણે એક્ઝિબિશનની મુલાકાત લઈ વિવિધ સ્ટોલનું નિરીક્ષણ કરી ટેક્સટાઈલ ઉદ્યોગકારો સાથે સંવાદ સાધ્યો હતો. આ પ્રસંગે ઉદ્યોગ રાજ્ય મંત્રીએ જણાવ્યું હતું કે, સુરત દેશનું અગ્રણી ટેક્સટાઈલ હબ છે અને અહીંના ઉદ્યોગકારોએ ગુણવત્તા, નવીનતા અને આધુનિક ટેક્નોલોજીના આધારે વૈશ્વિક સ્તરે પોતાની આગવી ઓળખ ઊભી કરી છે. આવા એક્ઝિબિશનો સ્થાનિક ઉત્પાદકોને રાષ્ટ્રીય અને આંતરરાષ્ટ્રીય બજારો સાથે જોડવાનું મહત્વપૂર્ણ માધ્યમ બનતા હોવાનું તેમણે જણાવ્યું હતું.મંત્રીએ ઉમેર્યું હતું કે, ‘મેક ઇન ઇન્ડિયા’, ‘આત્મનિર્ભર ભારત’ અને ‘વિકસિત ભારત–2047’ના સંકલ્પને સાકાર કરવામાં ટેક્સટાઈલ ઉદ્યોગની મહત્વપૂર્ણ ભૂમિકા છે. રાજ્ય સરકાર ઉદ્યોગોને આધુનિક સુવિધાઓ, સરળ નીતિઓ અને જરૂરી માળખાકીય સુવિધાઓ પૂરી પાડી ઉદ્યોગ વિકાસને સતત પ્રોત્સાહન આપી રહી છે.

કૃષિ ક્ષેત્ર બાદ સૌથી વધુ રોજગારી ટેક્સટાઈલ ક્ષેત્રમાં મળી રહી છે એમ ગર્વ સાથે જણાવી સુરતના કાપડ ઉદ્યોગકારોના સાહસ, ગ્લોબલ બિઝનેસ અને રોજગારી આપવામાં અગ્રણી ભૂમિકાની સરાહના કરી હતી. તેમણે કહ્યું કે, ટેક્નોલોજી આધારિત ઉત્પાદન, ગુણવત્તા સુધારણા અને વૈશ્વિક ધોરણોને અનુરૂપ ઉત્પાદનો દ્વારા સુરતનો ટેક્સટાઈલ ઉદ્યોગ વધુ મજબૂત બની રહ્યો છે. આવા પ્રદર્શનો નવા વેપાર સંબંધો વિકસાવવામાં, રોકાણ આકર્ષવામાં તથા રોજગારીની નવી તકો ઊભી કરવામાં મહત્વપૂર્ણ સાબિત થાય છે.મંત્રીએ વિવિધ સ્ટોલની મુલાકાત લઈ ફેબ્રિક ઉત્પાદનો, ટેક્સટાઈલ મશીનરી, નવીન ટેક્નોલોજી અને ઉદ્યોગ સાથે સંકળાયેલા ઉત્પાદનો વિશે માહિતી મેળવી હતી. તેમણે પ્રદર્શનના સફળ આયોજન બદલ આયોજકોને અભિનંદન પાઠવ્યા હતા.આ પ્રસંગે દ.ગુ. ચેમ્બર ઓફ કોમર્સના પ્રમુખ અશોક જીરાવાલા, ગ્રાસિમ ઇન્ડસ્ટ્રીઝ લિ.ના ગ્લોબલ પ્રેસિડેન્ટ મુરુગન થેનકોન્ડાર, બોમ્બે ડાઈંગના મેનેજર રાજનેશ દત્ત, અજમેરા ફેશન લિ.ના સીઈઓ અને ફાઉન્ડર અજય અજમેરા, સર્જન ઇન્ટરનેશનલના ફાઉન્ડર અમિત ડોભરિયા, અગ્રણી ટેક્સટાઈલ ઉદ્યોગપતિઓ, વેપારીઓ, ઉત્પાદકો, નિકાસકારો તેમજ મોટી સંખ્યામાં મુલાકાતીઓ ઉપસ્થિત રહ્યા હતા.