કેન્દ્રીય કૃષિ મંત્રીએ ડ્રોન સહિત આધુનિક કૃષિ સાધનોનું પણ કર્યું નિરીક્ષણ

કેન્દ્રીય કૃષિ અને ખેડૂત કલ્યાણ અને ગ્રામીણ વિકાસ મંત્રી શિવરાજ સિંહ ચૌહાણ આજે ગુજરાતની મુલાકાત દરમિયાન ખેડૂતોને મળ્યા હતા.

આ દરમિયાન, તેઓ જૂનાગઢના માણેકવાડા ગામમાં મગફળીના ખેતરમાં ગયા અને ખેડૂતો સાથે વાતચીત કરી અને તેમની પાસેથી માહિતી લીધી. કેન્દ્રીય મંત્રીએ ખેતરમાં ઉતરીને મગફળીનું 'નિંદામણ' પણ કર્યું હતું.ખેડૂતો સાથે વાતચીત કરતી વખતે, શિવરાજ સિંહ ચૌહાણે મગફળીની સુધારેલી જાતો, બિયારણની ગુણવત્તા, ઉપયોગમાં લેવાતા ખાતરો અને ઉત્પાદન તકનીકો વિશે ઊંડાણપૂર્વક ચર્ચા કરી હતી. ખેડૂતોએ તેમને મોસમી પડકારો, બજાર ભાવ અને મગફળીની ખેતીમાં સિંચાઈ સંબંધિત સમસ્યાઓથી વાકેફ કર્યા હતા.

કેન્દ્રીય કૃષિ મંત્રીએ અધિકારીઓ પાસેથી ખાસ કરીને ગુજરાતની પ્રખ્યાત અને અદ્યતન મગફળીની જાત 'ગિરનાર-4' ની વિશેષતાઓ અંગે વિગતવાર માહિતી મેળવી હતી. તેમણે ખેતરમાં ઉપલબ્ધ ડ્રોન અને આધુનિક કૃષિ ઉપકરણોનું પણ નિરીક્ષણ કર્યું અને ખેડૂતો પાસેથી તેમની અસર અને ઉપયોગિતા વિશે પ્રતિસાદ મેળવ્યો હતો.ખેડૂતોની મહેનતની પ્રશંસા કરતા  શિવરાજ સિંહ ચૌહાણે કહ્યું, "દેશની ખાદ્ય સુરક્ષામાં આપણા અન્નદાતાઓની ભૂમિકા અમૂલ્ય છે. સરકાર દરેક સ્તરે ખેડૂતો સાથે છે અને તેમની સમસ્યાઓના ઉકેલ માટે સંપૂર્ણ પ્રતિબદ્ધતા સાથે કામ કરી રહી છે.

કેન્દ્રીય કૃષિ મંત્રી શિવરાજ સિંહ ચૌહાણે આજે  સોમનાથ મંદિરમાં પ્રાર્થના અને દર્શન પણ કર્યા અને દેશવાસીઓના કલ્યાણ, શાંતિ અને સમૃદ્ધિ માટે પ્રાર્થના કરી હતી. આ દરમિયાન શિવરાજ સિંહ ચૌહાણે તેમના પત્ની સાધના સિંહ સાથે સોમનાથ મહાદેવના ચરણોમાં નમન કર્યું. તેમણે રૂદ્રાભિષેક અને આરતીમાં વિધિવત ભાગ લીધો અને દેશના ખેડૂતો, કામદારો, યુવાનો અને માતાઓ અને બહેનોના ઉજ્જવળ ભવિષ્ય માટે પ્રાર્થના કરી હતી. આ પ્રસંગે કેન્દ્રીય મંત્રીએ કહ્યું કે સોમનાથ માત્ર એક યાત્રાધામ નથી, પરંતુ સનાતન પરંપરાનો આત્મા છે.આ ઉપરાંત, ચૌહાણે ગીર રાષ્ટ્રીય ઉદ્યાનની મુલાકાત પણ લીધી હતી. આ દરમિયાન સિંહો અને ગીરના કુદરતી સૌંદર્ય વિશે વાત કરતા તેમણે કહ્યું કે, આજે મને ગુજરાતના ગૌરવ, ગીરના અદ્ભુત જંગલમાં પ્રકૃતિના અલૌકિક સૌંદર્યનો ખૂબ નજીકથી અનુભવ કરવાની તક મળી છે.