ગુજરાતમાં પહેલી સંપૂર્ણ ડિજિટલ જનગણના-2027 ની તૈયારી: ડાયરેક્ટર સુજલ મયાત્રા દ્વારા સુરતમાં પૂર્વ-ટેસ્ટની સમીક્ષા

ગુજરાતની જનગણના કચેરીના ડાયરેક્ટરસુજલ મયાત્રાએ સુરત મ્યુનિસિપલ કોર્પોરેશન (SMC) ખાતે જનગણના-2027 પૂર્વ-ટેસ્ટની ક્ષેત્રીય કામગીરીની વિગતવાર સમીક્ષા કરી હતી. આ સમીક્ષાના ભાગરૂપે તેમણે SMCના વોર્ડ નં.-2ની મુલાકાત લીધી હતી અને **હાઉસ લિસ્ટિંગ અને હાઉસિંગ ઓપરેશન્સ (HLO)**ની ચાલી રહેલી કામગીરીની માહિતી મેળવી હતી.

ડાયરેક્ટર  મયાત્રાએ જણાવ્યું હતું કે, આ પૂર્વ-ટેસ્ટ જનગણના-2027ની તૈયારીના ભાગરૂપે કરવામાં આવી રહી છે, જે દેશની પહેલી સંપૂર્ણ રીતે ડિજિટલ અને પેપરલેસ જનગણના હશે.આ પૂર્વ-ટેસ્ટનું મુખ્ય લક્ષ્ય ક્ષેત્રીય પ્રક્રિયાઓનું મૂલ્યાંકન, ડિજિટલ એપ્લિકેશન્સનું પરીક્ષણ અને સંપૂર્ણ જનગણના પહેલાં ઓપરેશનલ પડકારોની ઓળખ કરવાનું છે.મયાત્રાએ ગણતરીદારો અને સુપરવાઈઝરો સાથે વાતચીત કરીને તેમના પ્રયાસોની પ્રશંસા કરી હતી. તેમણે 100 ટકા ડિજિટલ ડેટા સંગ્રહ સુનિશ્ચિત કરવા માટે મોબાઈલ એપ્લિકેશન્સના ઉપયોગને પ્રોત્સાહન આપ્યું હતું અને ટેકનોલોજી દ્વારા કાર્યક્ષમતા, ચોકસાઈ તેમજ પારદર્શિતામાં વધારો કરવા પર ભાર મૂક્યો હતો.

ડાયરેક્ટર  મયાત્રાએ જનગણના-2027માં પહેલીવાર અમલમાં આવનાર સ્વ-ગણના (Self-Enumeration) વિકલ્પ પર વિશેષ ભાર મૂક્યો હતો. આ વિકલ્પ નાગરિકોને સુરક્ષિત ડિજિટલ પ્લેટફોર્મ પર પોતાની માહિતી ભરવાની સુવિધા આપે છે. તેમણે ફિલ્ડ સ્ટાફને નાગરિકોને આ વિકલ્પનો વ્યાપક ઉપયોગ કરવા પ્રોત્સાહિત કરવા સૂચન કર્યું હતું.

ફિલ્ડ મુલાકાત બાદ  મયાત્રાએ સુરતના કલેકટર ડૉ. સૌરભ પારધી અને સુરતના ઉપ મ્યુનિસિપલ કમિશનર નિધી સિવાચ સાથે પણ સમીક્ષા બેઠક કરી હતી. આ બેઠકમાં પૂર્વ-ટેસ્ટની પ્રગતિ, તાલીમ-મોનીટરીંગ સિસ્ટમ તેમજ જિલ્લા, ઉપ-જિલ્લા અને કોર્પોરેશન વચ્ચેના સંયોજન અંગે ચર્ચા કરવામાં આવી હતી.જનગણના ઓપરેશન્સ એ આગામી જનગણના-2027ને ઉચ્ચતમ સ્તરની ચોકસાઈ, કાર્યક્ષમતા અને નાગરિક કેન્દ્રિત પ્રક્રિયા સાથે સફળ બનાવવા માટે પ્રતિબદ્ધ છે.