ગ્રામીણ મિલકત ધારકોને 'સનદ' હવે વિના મૂલ્યે મળશે: મુખ્યમંત્રી ભૂપેન્દ્ર પટેલનો મહત્વપૂર્ણ નિર્ણય

ગ્રામીણ મિલકત ધારકોને 'સનદ' હવે વિના મૂલ્યે મળશે: મુખ્યમંત્રી ભૂપેન્દ્ર પટેલનો મહત્વપૂર્ણ નિર્ણય

ગુજરાતના ગ્રામીણ વિસ્તારોના મિલકત ધારકો માટે રાજ્ય સરકારે એક મહત્વપૂર્ણ અને સંવેદનાસ્પર્શી નિર્ણય લીધો છે. મુખ્યમંત્રી ભૂપેન્દ્ર પટેલે જાહેરાત કરી છે કે, 'સ્વામિત્વ' યોજના અંતર્ગત ગ્રામ્ય વિસ્તારોના મિલકત ધારકોને તેમની રહેણાંકની મિલકતના હક્ક દર્શાવતી 'સનદ' હવે વિના મૂલ્યે આપવામાં આવશે. આ નિર્ણયથી મિલકત ધારકો પર પડતું ₹200નું નાણાકીય ભારણ દૂર થશે, જે અંદાજે ₹50 કરોડ જેટલું રાજ્ય સરકાર ભોગવશે.

સ્વામિત્વ યોજના: ગ્રામીણ સશક્તિકરણનું પગલું

પ્રધાનમંત્રી નરેન્દ્ર મોદીના દિશાદર્શન હેઠળ ભારત સરકારના પંચાયતી રાજ વિભાગ દ્વારા 'સર્વે ઓફ વિલેજીસ એન્ડ મેપિંગ વિથ ઇમ્પ્રોવાઈઝ્ડ ટેકનોલોજી ઇન વિલેજ એરીયા' (SVAMITVA - સ્વામિત્વ) યોજના શરૂ કરવામાં આવી છે. આ યોજનાનો મુખ્ય ઉદ્દેશ્ય ડ્રોન ટેકનોલોજી દ્વારા ગ્રામીણ વિસ્તારોના આબાદી એરિયાની મિલકતોનો સર્વે કરીને ગ્રામ્ય પ્રજાને પ્રોપર્ટી કાર્ડ પૂરા પાડવાનો છે. આવા પ્રોપર્ટી કાર્ડની પ્રથમ નકલ મિલકત ધારકોને પહેલેથી જ વિના મૂલ્યે આપવામાં આવે છે.

મુખ્યમંત્રી ભૂપેન્દ્ર પટેલ સરકારનો સંવેદનાસ્પર્શી નિર્ણય

મુખ્યમંત્રી ભૂપેન્દ્ર પટેલે જમીન મહેસૂલ અધિનિયમ 1879ની જોગવાઈ મુજબ, જે સનદ માટે મિલકત ધારક પાસેથી ₹200ની સર્વે ફી લેવામાં આવતી હતી, તે ફી હવે ગ્રામીણ મિલકત ધારકોને માફ કરવાનો નિર્ણય કર્યો છે. આ નિર્ણયને પરિણામે, રાજ્યમાં 'સ્વામિત્વ' યોજના અંતર્ગત ગ્રામીણ વિસ્તારોના મિલકત ધારકોને પ્રોપર્ટી કાર્ડની નકલ ઉપરાંત તેમની રહેણાંકની મિલકતના હક્ક દર્શાવતી 'સનદ' પણ વિના મૂલ્યે મળશે.

રાજ્યમાં અંદાજે 25 લાખ ગ્રામીણ મિલકત સનદ વિતરણ થવાની અપેક્ષા છે, જે માટે આશરે ₹50 કરોડનું ભારણ રાજ્ય સરકાર ઉઠાવશે. મુખ્યમંત્રીનો આ સંવેદનાસ્પર્શી અભિગમ ગ્રામીણ વિસ્તારોના નાના, ગરીબ અને મધ્યમ વર્ગીય મિલકત ધારકોને સનદ મેળવવામાં સરળતા પ્રદાન કરશે અને તેમના માટે 'ઈઝ ઓફ લિવિંગ' સાકાર કરશે.

પ્રોપર્ટી કાર્ડના લાભો

સ્વામિત્વ યોજના હેઠળ મળતા પ્રોપર્ટી કાર્ડ દ્વારા ગ્રામીણ નાગરિકોને તેમની મિલકતો પર કાયદેસર અધિકાર મળે છે, જે તેઓને નાણાકીય રીતે સશક્ત બનાવે છે. આ પ્રોપર્ટી કાર્ડ થકી ગ્રામ્ય વિસ્તારના વિકાસમાં વધુ વેગ જોવા મળશે, ગ્રામ વિકાસના આયોજન માટે સચોટ જમીન રેકર્ડ તૈયાર થશે, કરની ચોક્કસ વસૂલાત થશે અને મિલકત સંબંધિત વિવાદો અને કાયદાકીય કેસોમાં ઘટાડો થશે.