છોટાઉદેપુર બેઠક પર ભાજપ દ્વારા પૂર્વ જિલ્લા ભાજપ પ્રમુખ જશુ રાઠવા અને કોંગ્રેસ દ્વારા પૂર્વ વિપક્ષ નેતા સુખરામ રાઠવાની પસંદગી

બંને ઉમેદવારોએ પ્રચાર માટે મત વિસ્તારમાં કાર્યકર્તા સાથે જનસંપર્ક બેઠકો યોજવાનું શરૃ કર્યું

છોટાઉદેપુર બેઠક પર ભાજપ દ્વારા પૂર્વ જિલ્લા ભાજપ પ્રમુખ જશુ રાઠવા અને કોંગ્રેસ દ્વારા પૂર્વ વિપક્ષ નેતા સુખરામ રાઠવાની પસંદગી કરવામાં આવી છે. ત્યારે ભાજપના ઉમેદવાર જશું રાઠવાએ પંચમહાલ જિલ્લાની હાલોલ વિધાનસભાની ઘોઘમ્બા, ઝીંઝરી, તલાવડી અને જાંબુઘોડા જિલ્લા પંચાયત વિસ્તારના કાર્યકર્તા સાથે જનસંપર્ક બેઠકો યોજી હતી. તેમણે ઘોઘમ્બા ખાતે આવેલ પૌરાણિક શિવમંદિર, નવું નિર્માણાધિન સ્વામિનારાયણ મંદિર અને ચેલાવાડા ખાતે આવેલ આદિવાસીઓના આરાધ્ય દેવ એવા બાબાદેવના મંદિરે શીશ નમાવી પ્રચારના શ્રી ગણેશ કર્યા હતા. જશું રાઠવાએ ઘોઘમ્બા જિલ્લાની રણજિત નગર, ઝીંઝરીની શામલકુવા ગામ,  તલાવડીની ઢીકવા તેમજ જાંબુઘોડા ખાતે સભા યોજી કાર્યકર્તાઓને સંબોધન કર્યું હતુ.