પશ્ચિમ એશિયાની સ્થિતિ વચ્ચે ગુજરાતમાં ઈંધણ પુરવઠો સ્થિર: ઉદ્યોગો માટે વૈકલ્પિક ઈંધણના નિયંત્રણોમાં 3 મહિનાની છૂટછાટ

પશ્ચિમ એશિયામાં પ્રવર્તતી વર્તમાન પરિસ્થિતિને ધ્યાનમાં રાખીને કેન્દ્ર અને રાજ્ય સરકાર દ્વારા પેટ્રોલિયમ ઉત્પાદનો તથા જીવન જરૂરી ચીજવસ્તુઓની ઉપલબ્ધતા પર સતત નજર રાખવામાં આવી રહી છે.

આ સંદર્ભમાં આજે પ્રેસ ઇન્ફોર્મેશન બ્યૂરો (PIB), અમદાવાદ ખાતે એક રાજ્ય સ્તરીય બ્રિફિંગ યોજાયું હતું, જેમાં વરિષ્ઠ અધિકારીઓએ રાજ્યની સ્થિતિ અંગે વિગતવાર માહિતી આપી હતી.

ઉદ્યોગ અને ખાણ વિભાગના અધિક કમિશનર  કે.સી. સંપતે જણાવ્યું હતું કે, ગેસ પુરવઠા પરનું દબાણ ઘટાડવા અને ઉદ્યોગોની કાર્યક્ષમતા જાળવી રાખવા માટે ઔદ્યોગિક અને વાણિજ્યિક એકમો માટે ઘન વૈકલ્પિક ઇંધણ (કોલસો, બાયોમાસ વગેરે) પરના નિયંત્રણો ત્રણ મહિના માટે હટાવી લેવામાં આવ્યા છે. મુખ્ય રાજ્યમાં કામદારોની છટણીના કોઈ મોટા બનાવો નોંધાયા નથી.રાજ્યના 4,11,733 નોંધાયેલા ઉદ્યોગોમાંથી મોટાભાગના કાર્યરત છે. માત્ર 1,212 એકમો ટકાઉપણાના પ્રશ્નોને કારણે બંધ થયા છે.159 ઔદ્યોગિક સામુદાયિક રસોડા દ્વારા આશરે 50,000 કામદારોને ભોજનની સુવિધા આપવામાં આવી રહી છે.

CNG અને PNG પુરવઠાની સ્થિતિ ગુજરાત સ્ટેટ પેટ્રોલિયમ કોર્પોરેશન (GSPC) ના સિનિયર વાઇસ પ્રેસિડન્ટ શ્રી દિપેન ચૌહાણે ખાતરી આપી હતી કે રાજ્યમાં ઇંધણનો પુરવઠો પર્યાપ્ત છે.ઔદ્યોગિક ગેસ સપ્લાયમાં કોઈ પણ પ્રકારનો કાપ મૂકવામાં આવ્યો નથી. રાજ્યમાં એકપણ CNG સ્ટેશન બંધ થયું નથી. દરરોજ 40 લાખ કિલો CNG નો વપરાશ થાય છે જેનાથી 7.50 લાખ વાહનો ચાલે છે.મુંદ્રા અને દહેજ ટર્મિનલ પર લિક્વિફાઇડ નેચરલ ગેસ (LNG) નો પૂરતો જથ્થો ઉપલબ્ધ છે.
ગુજરાત ભારતમાં 100% સિટી ગેસ લાઇસન્સ કવરેજ ધરાવતું પ્રથમ રાજ્ય છે. દેશના કુલ ઘરેલું PNG ગ્રાહકોમાં ગુજરાત 23% હિસ્સો ધરાવે છે.

ગ્રાહક વિભાગ મુજબની સ્થિતિ:| વિભાગ | ભારત | ગુજરાત | શેર (%) |

 ઘરેલું PNG કનેક્શન | 1,60,61,757 | 37,43,703 | 23% |
 વાણિજ્યિક જોડાણો | 47,765 | 24,456 | 51% |
 ઔદ્યોગિક જોડાણો | 21,250 | 5,888 | 28% |
 સીએનજી સ્ટેશનો | 8,527 | 1,073 | 13% |

સરકારે હોસ્પિટલો, શાળાઓ અને સામુદાયિક રસોડા જેવી આવશ્યક સેવાઓને PNG કનેક્શનમાં પ્રાથમિકતા આપવાનો નિર્દેશ આપ્યો છે. વધુમાં, નવી નોંધણી કરાવનાર ગ્રાહકો માટે ₹500 ના રિબેટ જેવી પ્રોત્સાહક યોજનાઓ પણ અમલમાં છે. ડિજિટલ સેવાનો વ્યાપ વધારવા માટે QR કોડ આધારિત સ્વ-નોંધણી અને માત્ર 7 દિવસમાં કનેક્શન આપવાની પ્રક્રિયા શરૂ કરવામાં આવી છે.સરકાર દ્વારા લેવામાં આવેલા આ આગોતરા પગલાંને કારણે પશ્ચિમ એશિયાના સંકટની અસર ગુજરાતના સામાન્ય નાગરિકો અને ઉદ્યોગો પર નહિવત રહેવાની સંભાવના છે.