બનાસકાંઠા: અબાલા ગામમાં દેશની પ્રથમ ગૌમૂત્ર ડેરી, પશુપાલકો માટે બની આવકનું સાધન

બનાસકાંઠાના ભાભર તાલુકાના અબાલા ગામમાં સ્થપાયેલી દેશની સૌપ્રથમ 'ગૌમૂત્ર ડેરી' ગ્રામીણ અર્થતંત્ર માટે આશીર્વાદરૂપ બની છે. દેવારામ પુરોહિત દ્વારા શરૂ કરાયેલા આ નવતર પ્રોજેક્ટને ગુજરાત સરકારના 'આઈ-હબ' (i-Hub) દ્વારા 5 લાખની આર્થિક સહાય મળી છે.

વર્ષ 2017 માં રોજની માત્ર 50 લીટરની ક્ષમતાથી શરૂ થયેલ આ પ્રોજેક્ટ આજે 10,000 લીટરની ક્ષમતા ધરાવતો વિશાળ પ્લાન્ટ બની ગયો છે. હાલમાં આસપાસના 7 થી 8 ગામોના 70 થી 80 પરિવારો પાસેથી દૈનિક 4000 લીટર ગૌમૂત્ર એકત્રિત કરવામાં આવે છે. આ પ્રયોગથી સ્થાનિક પશુપાલકોને દર મહિને હજારો રૂપિયાની વધારાની આવક થઈ રહી છે.પ્લાન્ટમાં ગૌમૂત્રને ૫૫ થી 60°C તાપમાને પ્રોસેસ કરીને તેમાંથી એમોનિયા, પોટાશ અને માઇક્રો ન્યુટ્રિએન્ટ્સ અલગ કરવામાં આવે છે. આ પ્રક્રિયાથી તૈયાર થતું ઓર્ગેનિક ખાતર અને કીટનાશક વિદેશી યુરિયા-પોટાશનો શ્રેષ્ઠ વિકલ્પ બની રહ્યું છે. ખેડૂતો આ પ્રાકૃતિક ઉત્પાદનોના ઉપયોગથી ખેતી ખર્ચમાં ઘટાડો કરી વધુ નફો મેળવી રહ્યા છે.આ પ્રોજેક્ટ આજે 'વેસ્ટમાંથી બેસ્ટ' અને 'આત્મનિર્ભર ગુજરાત'ના સપનાને સાકાર કરતું જીવંત ઉદાહરણ બન્યું છે.