મહીસાગર, તાપી, નવસારી અને ડાંગ જિલ્લામાં ધોધમાર વરસાદ, ઉપરવાસમાં અનરાધઘાર વરસાદના કારણે ડોલવણની ઓલન નદી બે કાંઠે

દક્ષિણ ગુજરાતમાં ભારે વરસાદને પગલે તાપી, નવસારી સહિત કેટલાક જિલ્લામાં જળબંબાકારની સ્થિતિ સર્જાઈ

દક્ષિણ અને મધ્ય ગુજરાતમાં વહેલી સવારથી ધોધમાર વરસાદ વરસી રહ્યો છે. સવારે 6 વાગ્યાથી બપોરના 12 વાગ્યા સુધીના 6 કલાકમાં 6 ઈંચથી વધુ વરસાદ વરસ્યો હતો..સૌથી વધુ ડાંગ જિલ્લાના વઘઈમાં સાડા 6 ઈંચ વરસાદ વરસ્યો હતો. જ્યારે તાપીના સોનગઢમાં 6 ઈંચ વરસાદ ખાબક્યો હતો. આ ઉપરાંત નવસારી જિલ્લાના વાંસદામાં પાંચ ઈંચ, તાપીના ડોલવણ, ઉચ્છલ અને વ્યારામાં ચાર-ચાર ઈંચ વરસાદ પડ્યો હતો.

ડાંગના વઘઇ અને સુબિરમાં ત્રણ-ત્રણ ઈંચ વરસાદ વરસી ગયો હતો.મહીસાગર જિલ્લાના લુણાવાડામાં સવારથી ક્યારેક ધીમીધારે તો ક્યારેક ધોધમાર વરસાદ વરસ્યો હતો. અંદાજે 1 ઈંચ વરસાદમાં માંડવી બજાર, હાટડિયા બજાર, હુસેની ચોક સહિતના વિસ્તારોમાં પાણી ભરાયા હતા. તો નવસારીમાં 3 દિવસના વિરામ બાક ફરી મેઘરાજા મહેરબાન થયા હતા. તો અમરેલી જિલ્લાના જાફરાબાદના દિરયામાં પવન સાથે કરંટ જોવા મળ્યો હતો. જાફરાબાદ બંદર પર હાલ 1 નંબરનું સિગ્નલ લગાવાયું છે અને માછીમારોને દરિયો ન ખેડવા તંત્ર દ્વારા સૂચના અપાઈ છે.