રાષ્ટ્રપતિ પુતિનની ટૂંક સમયમાં ભારત મુલાકાત,બંને દેશો વચ્ચેના સંબંધો મજબૂત બનશે

રશિયાના રાષ્ટ્રપતિ વ્લાદિમીર પુતિન આ મહિનાના અંતમાં ભારતની મુલાકાત લઈ શકે છે. રશિયન મીડિયા દ્વારા આ માહિતી આપવામાં આવી છે.

જેમાં રાષ્ટ્રીય સુરક્ષા સલાહકાર (NSA) અજિત ડોભાલ દ્વારા રશિયાની મુલાકાત દરમિયાન આપવામાં આવેલા નિવેદનને ટાંકીને જણાવાયું છે.મોસ્કોમાં રશિયન સુરક્ષા પરિષદના સચિવ સેરગેઈ શોઇગુ સાથે મુલાકાત દરમિયાન, ડોભાલે કહ્યું, "અમે હવે ખૂબ સારા સંબંધો સ્થાપિત કર્યા છે, જેને અમે ખૂબ મહત્વ આપીએ છીએ. આ એક વ્યૂહાત્મક ભાગીદારી છે. અમે ઉચ્ચ સ્તરે વાતચીત કરી રહ્યા છીએ. અમને એ જાણીને આનંદ થયો કે રાષ્ટ્રપતિ પુતિનની ભારત મુલાકાત આ મહિનાના અંતમાં નક્કી કરવામાં આવી છે."

અગાઉ, ક્રેમલિનના સહાયક યુરી ઉષાકોવે પણ પુષ્ટિ આપી હતી કે રાષ્ટ્રપતિ પુતિન પ્રધાનમંત્રી નરેન્દ્ર મોદીના આમંત્રણ પર ભારતની મુલાકાતે આવવાના છે. તેમણે કહ્યું કે આ વાર્ષિક દ્વિપક્ષીય શિખર સંમેલનની પરંપરા હેઠળ થઈ રહ્યું છે. તેમણે કહ્યું, "અમારા નેતાઓ વચ્ચે દર વર્ષે મળવાનો કરાર થયો છે. આ વખતે અમારો વારો છે."નોંધનીય છે કે રાષ્ટ્રપતિ પુતિન છેલ્લે 6 ડિસેમ્બર 2021 ના રોજ ભારતની મુલાકાતે આવ્યા હતા, જ્યારે 21મી ભારત-રશિયા વાર્ષિક સમિટ નવી દિલ્હીમાં યોજાઈ હતી. તે જ સમયે, પ્રધાનમંત્રી મોદી ગયા વર્ષે બે વાર રશિયાની મુલાકાતે ગયા હતા. પ્રથમ જુલાઈમાં 22મી ભારત-રશિયા સમિટમાં હાજરી આપવા અને બીજી ઓક્ટોબરમાં કાઝાનમાં યોજાયેલા બ્રિક્સ સમિટમાં હાજરી આપવા.

રશિયન વિદેશ પ્રધાન સેરગેઈ લવરોવે માર્ચમાં આયોજિત 'રશિયા અને ભારત: દ્વિપક્ષીય સંબંધો માટે નવો એજન્ડા' પરિષદમાં પુતિનની ભારત મુલાકાતની પુષ્ટિ કરતા કહ્યું હતું કે, "ભારત અને રશિયા વચ્ચે રાજકીય સંવાદ ઝડપથી વિકસી રહ્યો છે. આમાં આપણા નેતાઓનું મોટું યોગદાન છે. હવે રાષ્ટ્રપતિ પુતિનની ભારત મુલાકાતની તૈયારીઓ ચાલી રહી છે." તેમણે એમ પણ કહ્યું હતું કે "આપણા દેશો વચ્ચેના સંબંધો સમયની કસોટી પર ખરા ઉતર્યા છે અને આજે પણ એકબીજાના હિતોને ધ્યાનમાં રાખીને પરસ્પર આદર અને સમાનતા પર આધારિત સહયોગ ચાલુ રહે છે."

ક્રેમલિન દ્વારા જારી કરાયેલા નિવેદનમાં કહેવામાં આવ્યું છે કે "રશિયન અને ભારતીય સંબંધો વ્યૂહાત્મક સ્વભાવના છે અને કોઈપણ બાહ્ય પ્રભાવથી પ્રભાવિત નથી. તેઓ તમામ ક્ષેત્રોમાં ગતિશીલ રીતે વિકાસ કરી રહ્યા છે."આ સમય દરમિયાન પ્રધાનમંત્રી  મોદીએ પુતિનને ભારત આવવાનું આમંત્રણ પણ આપ્યું હતું, જેનો રાષ્ટ્રપતિ પુતિને ખુશીથી સ્વીકાર કર્યો હતો. જોકે, રાષ્ટ્રપતિ પુતિનના આમંત્રણ છતાં, પ્રધાનમંત્રી  મોદી રશિયામાં આયોજિત વિજય દિવસ ઉજવણીમાં હાજરી આપી શક્યા ન હતા.