રિવરફ્રંટ ખાતે 'સરસ મેળો 2020'નું આયોજન, ગ્રામીણ મહિલાઓના ઉત્પાદનોના લાગ્યા સ્ટૉલ 

ભારત સરકારના ગ્રામીણ વિકાસ મંત્રાલય અને ગુજરાત સરકારના ગ્રામ વિકાસ વિભાગના સંયુક્ત ઉપક્રમે સમગ્ર દેશના વિવિધ રાજ્યોમાંથી કલાત્મક ચીજવસ્તુઓનું ઉત્પાદન કરતા ગ્રામીણ મહિલા સ્વ-સહાય જૂથોના ઉત્થાન માટે અમદાવાદના સાબરમતી રીવરફ્રન્ટ ખાતે 'સરસ મેળો-2020'નું ભવ્ય આયોજન કરવામાં આવ્યું હતું. ગ્રામ વિકાસ રાજ્યમંત્રી બચુભાઈ ખાબડના હસ્તે આ મેળાનું ઉદઘાટન કરવામાં આવ્યું હતું.

દેશના વિવિધ રાજ્યો તથા ગુજરાત રાજ્યના ગ્રામીણ મહિલા સ્વ-સહાય જૂથોને બજાર વ્યવસ્થા પૂરી પાડી તેમના દ્વારા ઉત્પાદિત કરાયેલી કલાત્મક વિવિધ ચીજવસ્તુઓના વેચાણ થકી આવા સ્વ-સહાય જૂથોને પ્રોત્સાહિત કરવાના આશયથી આ સરસ મેળાનું આયોજન કરવામાં આવ્યું છે. આ પ્રસંગે અધિક ગ્રામ વિકાસ કમિશનર તેમજ મેનેજિંગ ડિરેક્ટર ગુજરાત લાઇવલીહુડ પ્રમોશન કં. લિ.ના ડી.જી. કાપડીયા તથા જિલ્લા વિકાસ અધિકારી મહેશબાબુ ઉપસ્થિત રહ્યા હતા.

તા. 16 થી 23 ફેબ્રુઆરી સુધી યોજાનાર આ સરસ મેળો કાર્યક્રમમાં સાંસ્કૃતિક કાર્યક્રમોનું આયોજન પણ કરવામાં આવ્યું છે. તે ઉપરાંત દેશભરના વિવિધ રાજ્યોમાંથી હસ્તકલા સાથે સંકળાયેલા ગ્રામીણ મહિલા જૂથો આ સરસ મેળાનો હિસ્સો બનશે અને તેમના દ્વારા તૈયાર કરાયેલી કલાત્મક ચીજવસ્તુઓ મેળામાં વિશેષ આક્રષણનું કેન્દ્ર બની રહેશે.

આ પ્રાદેશિક સરસ મેળામાં દેશના વિવિધ રાજ્યોના 50 સ્ટોલ તેમજ ગુજરાતના તમામ જિલ્લાના 100 જેટલા સ્ટોલ ઊભા કરવામાં આવ્યા છે. આ મેળામાં હરિયાણા, આંધ્રપ્રદેશ, આસામ, પંજાબ, છત્તિસગઢ, તેલંગાણા, ગોવા, ઓડિશા, ઉત્તરપ્રદેશ, કેરળ અને પોંડિચરી સહિતના રાજ્યો ભાગ લઈ રહ્યા છે.