ISRO એ એક મોટી સિદ્ધિ હાંસલ કરી, SpaDeX ઉપગ્રહોને સફળતાપૂર્વક કર્યા અનડોક

ભારતીય અવકાશ સંશોધન સંગઠન (ISRO)એ સ્પેડેક્સ મિશનના બે ઉપગ્રહોને સફળતાપૂર્વક અનડોક કર્યા છે, જે ભારત માટે એક મોટી સિદ્ધિ છે. આ સફળતા ચંદ્રયાન-4, ગગનયાન અને ભારતીય અવકાશ મથક (BAS) જેવા ભવિષ્યના મિશનને મદદ કરશે. સ્પેડેક્સ (સ્પેસ ડોકિંગ એક્સપેરિમેન્ટ) એ એક ખાસ મિશન છે જેમાં બે ઉપગ્રહો અવકાશમાં કેવી રીતે ડોક કરી શકે છે અને પછી અનડોક કરી શકે છે તેનું પરીક્ષણ કરવામાં આવ્યું હતું. આ ટેકનોલોજી ભવિષ્યના અવકાશ મિશન જેમ કે અવકાશ મથકો બનાવવા, ઉપગ્રહોનું સમારકામ કરવા અને ઊંડા અવકાશમાં મિશન મોકલવા માટે મહત્વપૂર્ણ છે.

નોંધનીય છે કે ISRO એ 30 ડિસેમ્બર 2024 ના રોજ શ્રીહરિકોટાથી PSLV-C60 રોકેટથી SDX-01 (ચેઝર) અને SDX-02 (ટાર્ગેટ) નામના બે ઉપગ્રહો લોન્ચ કર્યા હતા. ત્યારબાદ, 16 જાન્યુઆરી, 2025ના રોજ, ઈસરોએ આ બે ઉપગ્રહોને સફળતાપૂર્વક એકબીજા સાથે જોડ્યા, જેનાથી ભારત આ ટેકનોલોજી પ્રાપ્ત કરનાર અમેરિકા, રશિયા અને ચીન પછી વિશ્વનો ચોથો દેશ બન્યો. પછી, 13 માર્ચ, 2025ના રોજ, ઈસરોએ આ બંને ઉપગ્રહોને સફળતાપૂર્વક અલગ કર્યા, જે સાબિત કરે છે કે ભારત જટિલ અવકાશ મિશનને સંભાળી શકે છે.

ભવિષ્યના અવકાશ મિશન માટે આ ટેકનોલોજી ખૂબ જ મહત્વપૂર્ણ છે. ઇસરોની આ સફળતા સાથે એ સ્પષ્ટ થઈ ગયું કે ભારત હવે મોટા અને અદ્યતન અવકાશ મિશન માટે તૈયાર છે. કેન્દ્રીય મંત્રી જિતેન્દ્ર સિંહે ISRO ને અભિનંદન આપતા કહ્યું કે આ દરેક ભારતીય માટે ગર્વની વાત છે. તેમણે ભારતના અવકાશ કાર્યક્રમની સફળતા માટે વડા પ્રધાન નરેન્દ્ર મોદીના મજબૂત સમર્થનને મહત્વપૂર્ણ ગણાવ્યું. યુઆર રાવ સેટેલાઇટ સેન્ટર (યુઆરએસસી) અને અન્ય ઇસરો કેન્દ્રોએ સંયુક્ત રીતે સ્પેડેક્સ મિશન વિકસાવ્યું.