અમેરિકાએ સતત બીજા દિવસે ઈરાન પર બોમ્બમારો કર્યો

હોર્મુઝ સ્ટ્રેટ નજીક એક વાણિજ્યિક જહાજ પર ડ્રોન હુમલા બાદ અમેરિકાએ સતત બીજા દિવસે ઈરાન પર બોમ્બમારો કર્યો. અમેરિકાએ સિરિક શહેર, બંદર-એ-લેંઘે અને કેશમ ટાપુને નિશાન બનાવ્યા. દરમિયાન, બહેરીન અને કુવૈતમાં હવાઈ હુમલાના સાયરન વાગ્યા. કુવૈતી સૈન્યએ જણાવ્યું હતું કે, તે દુશ્મન મિસાઇલ અને ડ્રોન હુમલાઓનો જવાબ આપી રહ્યું છે. દરમિયાન, લેબનોનમાં શાંતિની આશાઓ ઠગારી નીવડી છે.

દુશ્મનાવટનો અંત લાવવા માટે લેબનીઝ સરકાર સાથે ફ્રેમવર્ક કરાર પર હસ્તાક્ષર કર્યાના એક દિવસ પછી, ઇઝરાયલે દક્ષિણ લેબનાન પર બોમ્બમારો કર્યો, જેમાં ઓછામાં ઓછો એક વ્યક્તિનું મોત નીપજ્યું. લેબનીઝ રાષ્ટ્રપતિ જોસેફ આઉને ઇઝરાયલી ઉલ્લંઘનોને રોકવા માટે યુએસ પ્રમુખ ટ્રમ્પ પાસે મદદ માંગી છે. દરમિયાન, ઈરાન સમર્થિત આતંકવાદી જૂથ હિઝબુલ્લાહે ઇઝરાયલ સાથેના કરારને નકારી કાઢ્યો છે, તેને "સાર્વભૌમત્વનું શરણાગતિ" ગણાવ્યું છે.

સીએનએન, અલ જઝીરા, એબીસી ન્યૂઝ અને સીબીએસ ન્યૂઝના અહેવાલો અનુસાર યુએસ સૈન્યએ કહ્યું કે, તેણે 10 ઈરાની લશ્કરી ઠેકાણાઓ પર હુમલો કર્યો. યુએસ સેન્ટ્રલ કમાન્ડ (સેન્ટકોમ) એ કહ્યું કે, યુએસ ફાઇટર જેટ્સે હોર્મુઝ સ્ટ્રેટ અને તેની આસપાસના અનેક સ્થળોએ હુમલો કર્યો. સેન્ટકોમે સોશિયલ મીડિયા પર હુમલાનો એક ઝાંખો વીડિયો પણ શેર કર્યો. ઈરાનના ઇસ્લામિક રિવોલ્યુશનરી ગાર્ડ કોર્પ્સ (આઈઆરજીસી) એ, પુષ્ટિ આપી કે અમેરિકાએ તેના તાજેતરના હુમલામાં દેશના પાંચ દરિયાકાંઠાના વિસ્તારોમાં બોમ્બમારો કર્યો.

આઈઆરજીસી કહે છે કે, દુશ્મન દ્વારા કોઈપણ આક્રમણનો કડક જવાબ આપવામાં આવશે. આઈઆરજીસીએ કહ્યું કે, અમેરિકા અને ઈરાન વચ્ચેના વચગાળાના કરાર હેઠળ, તેહરાન પાસે હોર્મુઝ સ્ટ્રેટમાં ટ્રાફિક પર નિયંત્રણ છે, જેનું અમેરિકા ઉલ્લંઘન કરી રહ્યું છે. અને હવેથી, નિયમોનું ઉલ્લંઘન કરનારા જહાજો સામે પહેલા કરતાં વધુ કડક કાર્યવાહી કરવામાં આવશે.

રાષ્ટ્રપતિ ટ્રમ્પ કહે છે કે, ઈરાને યુદ્ધવિરામનું ઉલ્લંઘન કર્યું હોવાથી હુમલા કરવામાં આવ્યા હતા. તેમણે કહ્યું કે, યુએસ વિમાનોએ ઈરાની મિસાઈલ અને ડ્રોન સ્ટોરેજ સાઇટ્સ તેમજ દરિયાકાંઠાના રડાર સુવિધાઓને નિશાન બનાવી છે. સેન્ટકોમનો દાવો છે કે, 2 મિલિયન બેરલથી વધુ તેલ વહન કરતા પનામાના ધ્વજવાળા ટેન્કર પર ઈરાન દ્વારા રાત્રે કરવામાં આવેલા ડ્રોન હુમલાના જવાબમાં યુએસ સેનાએ આ હુમલાઓ કર્યા હતા.

ટ્રમ્પે ચેતવણી આપી હતી કે, એવો સમય આવી શકે છે જ્યારે અમેરિકાને સંપૂર્ણ પાયે લશ્કરી હુમલો કરવાની ફરજ પાડવામાં આવશે. તેમણે કહ્યું કે, જો આવું થશે, તો ઈરાનનું ઈસ્લામિક રિપબ્લિક અસ્તિત્વમાં રહેશે નહીં. દરમિયાન, યુએસ હુમલાના જવાબમાં ઈરાને બહેરીન અને કુવૈતમાં યુએસ દળોને નિશાન બનાવ્યા. ઈરાનની આઈઆરએનએ અને તસ્નીમ સમાચાર એજન્સીઓએ આઈઆરજીસી તરફથી એક નિવેદન બહાર પાડ્યું, જેમાં કુવૈત અને બહેરીનમાં થયેલા હુમલાઓની પુષ્ટિ કરવામાં આવી.

આઈઆરજીસી એ જણાવ્યું હતું કે, તેની નૌકાદળ અને વાયુસેનાએ કુવૈતમાં યુએસ અલી અલ સાલેમ એર બેઝ અને બહેરીનની રાજધાની મનામામાં પોર્ટ સલમાન ખાતે સ્થિત યુએસ ફિફ્થ નેવલ ફ્લીટ પર બેલિસ્ટિક મિસાઇલો અને ડ્રોન છોડ્યા હતા. નિવેદનમાં કહેવામાં આવ્યું છે કે આ હુમલાઓ પાંચ ઈરાની દરિયાકાંઠાના વિસ્તારોમાં યુએસ બોમ્બ ધડાકાના જવાબમાં હતા. ઓમાને બહેરીન પર કથિત ઈરાની ડ્રોન હુમલાની નિંદા કરી હતી.

નોંધનીય છે કે, ફેબ્રુઆરીના અંતમાં શરૂ થયેલી લડાઈ હજુ સુધી બંધ થઈ નથી. રાષ્ટ્રપતિ ડોનાલ્ડ ટ્રમ્પે 28 ફેબ્રુઆરીએ ઈરાન સામે મોટી લશ્કરી કાર્યવાહીની જાહેરાત કરી હતી. આ પછી, અમેરિકા અને ઇઝરાયલે સંયુક્ત રીતે ઇરાની સૈન્ય, સરકાર અને માળખાગત સુવિધાઓ પર મોટા પાયે હુમલાઓ શરૂ કર્યા. આનાથી મધ્ય પૂર્વમાં કટોકટી વધી. શાંતિ માટે અનેક પ્રયાસો ચાલી રહ્યા હતા. આ સંદર્ભમાં, અમેરિકા અને ઈરાની પ્રતિનિધિમંડળો આ સપ્તાહના અંતે સ્વિટ્ઝર્લૅન્ડના બર્ગનસ્ટોક રિસોર્ટ પહોંચ્યા અને યુદ્ધનો અંત લાવવા માટે કરાર માટે વાટાઘાટો શરૂ કરી. આ વાટાઘાટોનો આધાર ગયા અઠવાડિયે બંને દેશો વચ્ચે હસ્તાક્ષર કરાયેલ સમજૂતી પત્ર હતો. આ આગળ વધે તે પહેલાં, લડાઈ ફરી શરૂ થઈ.