અમેરિકી સેનાએ નાઇજીરિયામાં ISISના ઠેકાણાઓ પર કર્યો બોમ્બમારો

અમેરિકી રાષ્ટ્રપતિ ડોનાલ્ડ ટ્રમ્પે જણાવ્યું કે સંયુક્ત રાજ્ય અમેરિકાએ ઉત્તર-પશ્ચિમ નાઇજીરિયામાં ISIL (ISIS)ના આતંકીઓ વિરુદ્ધ હવાઈ હુમલો કર્યો છે. ખાસ વાત એ રહી કે ટ્રમ્પે આ માહિતી આપવા માટે ક્રિસમસના દિવસની પસંદગી કરી હતી.

ટ્રમ્પના આદેશ પર અમેરિકાએ ઉત્તર-પશ્ચિમ નાઇજીરિયામાં ISIS આતંકીઓ પર ઘાતક હુમલો કર્યો
ટ્રમ્પે ગુરુવારે પોતાના 'ટ્રુથ સોશિયલ' પ્લેટફોર્મ પર એક પોસ્ટમાં કહ્યું, "આજે રાત્રે, કમાન્ડર-ઇન-ચીફ તરીકે મારા નિર્દેશ પર અમેરિકાએ ઉત્તર-પશ્ચિમ નાઇજીરિયામાં ISIS આતંકવાદીઓ વિરુદ્ધ એક શક્તિશાળી અને ઘાતક હુમલો કર્યો છે."

ખ્રિસ્તીઓ પર અત્યાચાર રોકવાની ચેતવણી બાદ કાર્યવાહી
તેમણે કહ્યું કે ISIS આતંકવાદીઓએ મુખ્યત્વે નિર્દોષ ખ્રિસ્તીઓને નિશાન બનાવ્યા અને નિર્દયતાથી તેમની હત્યા કરી, જે વર્ષો અને સદીઓમાં ક્યારેય જોવા મળી નહોતી. ટ્રમ્પે ઉમેર્યું, "મેં અગાઉ જ આ આતંકવાદીઓને ચેતવણી આપી હતી કે જો તેઓ ખ્રિસ્તીઓનો નરસંહાર બંધ નહીં કરે તો તેમને તેનું પરિણામ ભોગવવું પડશે અને આજે રાત્રે એવું જ થયું."

નાઇજીરિયાના અધિકારીઓની વિનંતી પર હવાઈ હુમલો, અનેક આતંકીઓ ઠાર
અમેરિકી સેનાની આફ્રિકા કમાન્ડ (AFRICOM) એ સોશિયલ મીડિયા પ્લેટફોર્મ ‘X’ પર જણાવ્યું કે આ હવાઈ હુમલો નાઇજીરિયન સત્તાવાળાઓની વિનંતી પર કરવામાં આવ્યો હતો અને તેમાં 'અનેક આતંકવાદીઓ' માર્યા ગયા છે.

અમેરિકી સંરક્ષણ સચિવ પીટ હેગસેથે લખ્યું, "હું નાઇજીરિયન સરકારના સમર્થન અને સહયોગ માટે આભારી છું." તેમણે ચેતવણી આપી કે હજુ પણ ઘણું થવાનું બાકી છે. AFRICOM એ જણાવ્યું કે આ હુમલો નાઇજીરિયાના સોકોટો રાજ્યમાં થયો હતો.

હુમલાનું પૃષ્ઠભૂમિ અને નાઇજીરિયાનો પક્ષ
અમેરિકી યોજના: આ લશ્કરી કાર્યવાહી ટ્રમ્પના તે નિવેદનના અઠવાડિયા પછી થઈ છે જેમાં તેમણે પેન્ટાગોનને નાઇજીરિયામાં ખ્રિસ્તીઓના ઉત્પીડનના દાવા બાદ સંભવિત લશ્કરી કાર્યવાહીની યોજના શરૂ કરવા આદેશ આપ્યો હતો.

નાઇજીરિયાનો ઇનકાર: અગાઉ નાઇજીરિયાની સરકારે ટ્રમ્પના દાવાઓને ફગાવી દીધા હતા અને કહ્યું હતું કે સશસ્ત્ર જૂથો દેશમાં મુસ્લિમ અને ખ્રિસ્તી બંને સમુદાયોને નિશાન બનાવે છે અને સરકાર ધાર્મિક સ્વતંત્રતાની રક્ષા માટે સક્રિય છે.

સુરક્ષા સહયોગ: ટ્રમ્પ દ્વારા હુમલાની જાહેરાત બાદ નાઇજીરિયાના વિદેશ મંત્રાલયે પુષ્ટિ કરી કે તેઓ આતંકવાદના જોખમ સામે લડવા માટે અમેરિકા સહિતના આંતરરાષ્ટ્રીય ભાગીદારો સાથે સુરક્ષા સહયોગમાં જોડાયેલા છે.