ઇન્ડોનેશિયામાં ભૂસ્ખલન અને પૂરને કારણે 17 લોકોના મોત, 8 લાપતા

ઇન્ડોનેશિયાના જાવા ટાપુ પર મુશળધાર વરસાદ પછી આવેલા પૂર અને ભૂસ્ખલનને કારણે પહાડી ગામડાઓમાં ભારે વિનાશ થયો છે. આ દુર્ઘટનામાં અત્યાર સુધીમાં 17 લોકોના મોત થયા છે જ્યારે 8 લોકો હજુ પણ લાપતા છે.

ભારે વરસાદને કારણે નદીઓ છલકાઈ ગઈ અને મધ્ય જાવા પ્રાંતના પેકાલોંગન વિસ્તારના નવ ગામોમાં પાણી ઘૂસી ગયા. ટેકરીઓ પરથી પડતા કાદવ, ખડકો અને વૃક્ષોને કારણે વસાહતોને ભારે નુકસાન થયું. સૌથી વધુ અસરગ્રસ્ત પેટુંગક્રિઓનો ગામમાં બચાવ કાર્યકરોએ 17 મૃતદેહો બહાર કાઢ્યા હતા. ગુમ થયેલા લોકોની શોધ ચાલુ છે. દરમિયાન, 11 ઘાયલ લોકોને બચાવી લેવામાં આવ્યા હતા અને સારવાર માટે નજીકની હોસ્પિટલોમાં લઈ જવામાં આવ્યા હતા. ખરાબ હવામાન, ઉબડખાબડ ભૂપ્રદેશ અને વારંવાર ભૂસ્ખલનને કારણે બચાવ કામગીરીમાં અવરોધ ઉભો થયો છે.

ઇન્ડોનેશિયામાં ઓક્ટોબરથી માર્ચ દરમિયાન ભારે વરસાદ પડે છે, જેના કારણે ઘણીવાર પૂર અને ભૂસ્ખલન થાય છે. આ દ્વીપસમૂહ 17,000થી વધુ ટાપુઓનો દેશ છે, જ્યાં મોટી સંખ્યામાં લોકો પર્વતીય વિસ્તારોમાં અથવા પૂરગ્રસ્ત વિસ્તારોમાં રહે છે. તાજેતરના મહિનાઓમાં પણ આવી જ આફતો જોવા મળી છે. ડિસેમ્બરમાં, પશ્ચિમ જાવા પ્રાંતના સુકાબુમી વિસ્તારમાં ભૂસ્ખલન અને ભારે પવનને કારણે 12 લોકો માર્યા ગયા હતા. તે જ સમયે, નવેમ્બરમાં, ઉત્તર સુમાત્રા પ્રાંતમાં ભારે વરસાદને કારણે આવેલા પૂર અને ભૂસ્ખલનમાં 20 લોકોએ જીવ ગુમાવ્યા હતા.