ઈરાને ઈરાક અને કતાર પર હુમલો કર્યો, કતારે કહ્યું: જવાબ આપવાનો અધિકાર અનામત

ઈરાન દ્વારા અમેરિકી લશ્કરી ઠેકાણાઓ પર છ મિસાઈલો છોડવામાં આવી, જેનાથી ઈઝરાયલ સાથેનો તેમનો સંઘર્ષ વધુ વધ્યો.

ઈરાને સોમવારે ઈરાક અને કતારમાં આવેલા અમેરિકી લશ્કરી ઠેકાણાઓ પર છ મિસાઈલો છોડી, જેનાથી ઈઝરાયલ સાથેનો તેમનો સંઘર્ષ વધુ વધ્યો. આ હુમલાઓ રવિવારે વહેલી સવારે તેહરાન પર અમેરિકાના હુમલાના બદલામાં કરવામાં આવ્યા હતા. આ દરમિયાન, કતારે જાહેરાત કરી કે તે ઈરાની હુમલાનો સીધો જવાબ આપવાનો અધિકાર પણ અનામત રાખે છે. 

અમે આ હુમલાને સાર્વભૌમત્વ, આંતરરાષ્ટ્રીય કાયદા અને UN ચાર્ટરનું ઘોર ઉલ્લંઘન માનીએ છીએ: કતાર

કતારના વિદેશ મંત્રાલયના પ્રવક્તા માજેદ અલ-અંસારીએ સોમવારે કહ્યું હતું કે,  "અમે આને કતારની સાર્વભૌમત્વ, તેના હવાઈ ક્ષેત્ર, આંતરરાષ્ટ્રીય કાયદા અને UN ચાર્ટરનું ઘોર ઉલ્લંઘન માનીએ છીએ. અમે પુષ્ટિ આપીએ છીએ કે કતાર આંતરરાષ્ટ્રીય કાયદા અનુસાર આ આક્રમણની પ્રકૃતિ અને સ્કેલનો સીધો જવાબ આપવાનો અધિકાર અનામત રાખે છે."

કતારે ઈરાનના હુમલાની સખત નિંદા કરી 

કતારના વિદેશ મંત્રાલયના પ્રવક્તાએ કહ્યું કે, કતાર ઈરાની રિવોલ્યુશનરી ગાર્ડ દ્વારા અલ-ઉદેદ એર બેઝ પર કરવામાં આવેલા હુમલાની સખત નિંદા કરે છે. અન્સારીએ વધુમાં કહ્યું કે, "અમે ખાતરી આપીએ છીએ કે કતારના હવાઈ સંરક્ષણે સફળતાપૂર્વક હુમલાને નિષ્ફળ બનાવ્યો અને ઈરાની મિસાઇલોને અટકાવી દીધી. અમે એ પણ ભાર મૂકીએ છીએ કે આવી આક્રમક લશ્કરી કાર્યવાહી ચાલુ રાખવાથી આ ક્ષેત્રમાં સુરક્ષા અને સ્થિરતા નબળી પડશે, જે આંતરરાષ્ટ્રીય શાંતિ અને સુરક્ષા માટે વિનાશક પરિણામો તરફ દોરી શકે છે."

તમામ લશ્કરી કાર્યવાહી તાત્કાલિક બંધ કરવા અને શાંતિ સંવાદ તરફ વળવા કતારની હાંકલ

પ્રવક્તા અન્સારીએ કહ્યું કે, કતાર તમામ લશ્કરી કાર્યવાહી તાત્કાલિક બંધ કરવા અને સંવાદ અને વાતચીત માટે ગંભીરતાથી ટેબલ પર પાછા ફરવાની માંગ કરે છે. અન્સારીએ ભારપૂર્વક કહ્યું હતું કે, કતાર એ પ્રથમ દેશોમાંનો એક છે જેણે આ ક્ષેત્રમાં વધતા ઇઝરાયેલી આક્રમણના જોખમો વિશે ચેતવણી આપી હતી.

"ઇમરજન્સીને દૂર કરવા, પ્રદેશની સુરક્ષા અને તેના લોકો માટે શાંતિ સુનિશ્ચિત કરવાનો એકમાત્ર રસ્તો વાતચીત"

પ્રવક્તા અન્સારીએ ભારપૂર્વક કહ્યું હતું કે, વર્તમાન ઇમરજન્સીને દૂર કરવા, પ્રદેશની સુરક્ષા અને તેના લોકો માટે શાંતિ સુનિશ્ચિત કરવાનો એકમાત્ર રસ્તો વાતચીત છે. અન્સારીએ કહ્યું કે, પ્રદેશમાં તણાવને ધ્યાનમાં રાખીને સુરક્ષા અને સાવચેતીના પગલા તરીકે US બેઝ પહેલાથી જ ખાલી કરાવી દેવામાં આવ્યો છે.

અગાઉ ઈરાને ઈરાક અને કતારમાં સ્થિત અમેરિકી લશ્કરી ઠેકાણાઓ પર છ મિસાઈલ છોડી હતી.

આ પહેલા ઈરાને ઈરાક અને કતારમાં આવેલા અમેરિકી લશ્કરી ઠેકાણા પર છ મિસાઈલો છોડી હતી. આ બધા વચ્ચે, કતારના વિદેશ મંત્રાલયે સોમવારે ઈરાનના હુમલા બાદ સાવચેતીના પગલા તરીકે હવાઈ ટ્રાફિકને 'કામચલાઉ' સ્થગિત કરવાની જાહેરાત કરી હતી. વિદેશ મંત્રાલયે એક નિવેદનમાં જણાવ્યા મુજબ, "કતારના નાગરિકો, રહેવાસીઓ અને મુલાકાતીઓની સલામતી સુનિશ્ચિત કરવાની ઉત્સુકતાના ભાગ રૂપે, સંબંધિત અધિકારીઓએ પ્રદેશમાં તાજેતરની ઘટનાઓના આધારે સાવચેતીના પગલાના સમૂહ તરીકે દેશના હવાઈ ક્ષેત્રમાં હવાઈ માર્ગનિર્દેશનને કામચલાઉ સ્થગિત કરવાની જાહેરાત કરી છે."

હુમલામાં કોઈ નાગરિક કે લશ્કરી કર્મચારીના મોત કે ઘાયલ થયાના કોઈ અહેવાલ નહીં

ઈરાન દ્વારા US લશ્કરી ઠેકાણા પર છોડવામાં આવેલી મિસાઈલોમાં કોઈ નાગરિક કે લશ્કરી કર્મચારીના મૃત્યુ કે ઘાયલ થયાના કોઈ અહેવાલ નથી. કતારના સંરક્ષણ મંત્રાલયે સોમવારે કહ્યું કે, "ભગવાનનો આભાર, સશસ્ત્ર દળોની સતર્કતા અને સાવચેતીના પગલાં, આ ઘટનામાં કોઈ મૃત્યુ કે ઈજાની ઘટના બની નથી."