ચીનના રાષ્ટ્રપતિ શી જિનપિંગ આજથી કઝાકિસ્તાન-તાજિકિસ્તાનની 5 દિવસીય મુલાકાતે, SCO સમિટમાં ભાગ લેશે

ચીનના રાષ્ટ્રપતિ શી જિનપિંગ આજથી કઝાકિસ્તાન અને તાજિકિસ્તાનની પાંચ દિવસીય મુલાકાતે છે. ચીનના વિદેશ મંત્રાલયે રવિવારે જાહેરાત કરી હતી કે ચીનના રાષ્ટ્રપતિ શી જિનપિંગ કઝાકિસ્તાનની રાજધાની અસ્તાનામાં 2 થી 6 જુલાઈ દરમિયાન શાંઘાઈ કોઓપરેશન ઓર્ગેનાઈઝેશનના કાઉન્સિલ ઓફ હેડ ઓફ સ્ટેટની 24મી સમિટમાં ભાગ લેશે.

પ્રવક્તા હુઆ ચુનયિંગે જણાવ્યું હતું કે, કઝાકના રાષ્ટ્રપતિ કાસિમ-જોમાર્ટ ટોકાયેવ અને તાજિકિસ્તાનના રાષ્ટ્રપતિ ઈમોમાલી રહેમોનના આમંત્રણ પર શી કઝાકિસ્તાન અને તાજિકિસ્તાનની રાજ્ય મુલાકાતો પણ કરશે. 

મીડિયા અહેવાલો અનુસાર, સમિટમાં અફઘાનિસ્તાનની સ્થિતિ, રશિયા-યુક્રેન યુદ્ધ અને SCO સભ્ય દેશો વચ્ચે એકંદર સુરક્ષા સહયોગને પ્રોત્સાહન આપવા અંગે ચર્ચા થવાની અપેક્ષા છે. કઝાકના રાષ્ટ્રપતિ કાસિમ-જોમાર્ટ ટોકાયેવ દ્વારા આયોજિત આ સમિટમાં રશિયાના રાષ્ટ્રપતિ વ્લાદિમીર પુતિન, ચીનના રાષ્ટ્રપતિ શી જિનપિંગ, મધ્ય એશિયાના નેતાઓ અને પાકિસ્તાનના વડા પ્રધાન શેહબાઝ શરીફ હાજરી આપે તેવી અપેક્ષા છે.

બીજી તરફ, ભારતના વિદેશ મંત્રાલય (MEA) એ 28 જૂને જાહેરાત કરી હતી કે વિદેશ મંત્રી ડૉ. એસ. જયશંકર આગામી સપ્તાહે યોજાનારી શાંઘાઈ કોઓપરેશન ઓર્ગેનાઈઝેશન (SCO) સમિટમાં ભારતીય પ્રતિનિધિમંડળનું નેતૃત્વ કરશે. મીડિયા સાથે વાત કરતા વિદેશ મંત્રાલયના પ્રવક્તા રણધીર જયસ્વાલે કહ્યું હતું કે આ સમિટ કઝાકિસ્તાનના અસ્તાનામાં 3 થી 4 જુલાઈ દરમિયાન યોજાશે.

તમને જણાવી દઈએ કે, ભારતે વર્ષ 2023માં SCO સમિટનું આયોજન કર્યું હતું. આ વર્ષે કઝાકિસ્તાન જૂથના વર્તમાન અધ્યક્ષ તરીકે સમિટનું આયોજન કરી રહ્યું છે. 2001માં રચાયેલ શાંઘાઈ કોઓપરેશન ઓર્ગેનાઈઝેશન એ એક રાજકીય, આર્થિક અને સુરક્ષા જૂથ છે. હાલમાં તેના સભ્યો ચીન, રશિયા, ભારત, પાકિસ્તાન, કઝાકિસ્તાન, કિર્ગિસ્તાન, તાજિકિસ્તાન અને ઉઝબેકિસ્તાન છે.