ત્રિનિદાદ અને ટોબેગોના પ્રધાનમંત્રી કમલાએ તેમના ભાષણમાં પ્રધાનમંત્રી મોદીની કવિતા વાંચી

પ્રધાનમંત્રી મોદી તેમની મુલાકાતના બીજા તબક્કામાં ત્રિનિદાદ અને ટોબેગો પહોંચ્યા. તેમણે અહીં ત્રિનિદાદ અને ટોબેગોના પ્રધાનમંત્રી કમલા પ્રસાદ-બિસેસરને મળ્યા. તે ક્ષણ ખાસ હતી જ્યારે પીએમ કમલાએ પીએમ મોદીના પુસ્તક 'આંખ આ ધન્ય છે' માં પ્રકાશિત એક કવિતાનો ઉલ્લેખ કર્યો. આ કવિતા દ્વારા કમલાએ ભારત અને કેરેબિયન વચ્ચેના સ્થાયી સંબંધો અને ભારતીય ડાયસ્પોરા સાથે પીએમ મોદીના ઊંડા ભાવનાત્મક જોડાણ પર પ્રકાશ પાડ્યો.
 
પ્રધાનમંત્રી કમલાએ પ્રધાનમંત્રી મોદીની ઘણી પ્રશંસા કરી અને પીએમ મોદીની મુલાકાતનું સમ્માન કર્યું. તેમણે કહ્યું, "અમને ખૂબ જ પ્રિય વ્યક્તિની હાજરીનો લહાવો મળ્યો છે. આ મુલાકાત માત્ર ઔપચારિકતા નથી પણ અમારા માટે ખૂબ જ સન્માનની વાત છે. મને વિશ્વના સૌથી આદરણીય અને સ્વપ્નદ્રષ્ટા નેતાઓમાંના એક, ભારતના પ્રધાનમંત્રી નરેન્દ્ર મોદીનું સ્વાગત કરવાનો વિશેષ લહાવો મળ્યો છે."

તેમણે વધુમાં કહ્યું કે, "પ્રધાનમંત્રી, તમે એક પરિવર્તનશીલ શક્તિ છો જેમણે ભારતના શાસનમાં સુધારો કર્યો છે અને તમારા દેશને એક અગ્રણી વૈશ્વિક શક્તિ તરીકે સ્થાપિત કર્યો છે. તમારા સ્વપ્નદ્રષ્ટા અને ભવિષ્યવાદી પહેલોએ ભારતીય અર્થતંત્રને આધુનિક બનાવ્યું છે, એક અબજથી વધુ નાગરિકોને સશક્ત બનાવ્યા છે, અને સૌથી ઉપર તમે વિશ્વભરના ભારતીયોના હૃદયમાં ગર્વની ભાવના જગાડી છે."

તેમણે કોવિડ-19 મહામારી દરમિયાન મોદીના નેતૃત્વ અને ભારતની વૈશ્વિક રસી મૈત્રી પહેલ પર પણ પ્રકાશ પાડ્યો. પ્રધાનમંત્રી તરીકે મોદીની ત્રિનિદાદ અને ટોબેગોની આ પહેલી મુલાકાત છે અને 1999 પછી કોઈ ભારતીય વડાપ્રધાન દ્વારા કેરેબિયન દેશની પહેલી દ્વિપક્ષીય મુલાકાત છે. પીએમ મોદીની આ મુલાકાત ત્રિનિદાદ અને ટોબેગોના વડાપ્રધાનના આમંત્રણ પર થઈ રહી છે.

કવિતા
દૂર દૂરના ભૂતકાળમાં હું જઈ શકું છું
અને એક એક ચહેરાને સ્પષ્ટપણ ઓળખી શકું છું.
કોઈ તણાવ સાથે સ્મૃતિને ખેંચવી પડતી નથી
સહજ બધું દેખાઈ જાય છે, ઓળખાઈ જાય છે, 
કશુંય અળપાઈ નથી જતું, સાવ સાદીસીધી વાત આટલી જ
કે જેમની સાથે સહન કર્યું હોય
એ કદી ભુલાતા નથી
અને સાથે વેઠેલી 
યાતના છેવટે તો યાત્રા થઈ જાય છે.