નેપાળે મસ્કની શરત ન માની, સ્ટારલિંકને સો ટકા હિસ્સેદારી આપવાનો ઇનકાર

નેપાળે અમેરિકી કંપની સ્ટારલિંકને, સો ટકા માલિકી આપવાનો ઇનકાર કર્યો છે. સ્ટારલિંક દુનિયાના સૌથી ધનિક એલોન મસ્કની કંપની છે. નેપાળે તેની નવી દૂરસંચાર નીતિ હેઠળ 20 ટકા સ્થાનિક ભાગીદારી સાથે વિદેશી રોકાણની શરત મૂકી છે. સરકારની આ શરતે સ્ટારલિંકને નેપાળમાં તેની સેવાના વિસ્તરણ માટે હાલ પૂરતું રોકી દીધું છે.

નેપાળમાં 100 ટકા માલિકીની શરત વચ્ચે, વિશ્વસ્તરીય ટેકનોલોજી કંપનીને દેશમાં લાવીને ડિજિટલાઇઝેશનનો વિસ્તાર કરવાનો પ્રયાસ તાત્કાલિક સફળ થતો દેખાઈ રહ્યો નથી. નેપાળ દૂરસંચાર પ્રાધિકરણ વિદેશી રોકાણકારોની હિસ્સેદારી મર્યાદિત રાખવા માટે ફરજિયાત સ્થાનિક ભાગીદારની જૂની વ્યવસ્થા પર કાયમ છે.

તાજેતરમાં દૂરસંચાર નીતિના મુસદ્દામાં, દૂરસંચાર સેવા સંચાલિત કરવા ઈચ્છુક વિદેશી રોકાણકારો માટે સ્થાનિક ભાગીદારને ફરજિયાતપણે 20 ટકા હિસ્સેદારી આપવાની જૂની નીતિને જ ચાલુ રાખવામાં આવી છે. આ કારણોસર મસ્કની કંપની સ્ટારલિંક માટે નેપાળમાં સેટેલાઇટ ઇન્ટરનેટ સેવા શરૂ કરવી સરળ દેખાઈ રહી નથી.

આ જ વર્ષે મે મહિનામાં સ્ટારલિંકના નિર્દેશક રેબેકા સ્લિક હન્ટર, નેપાળ આવ્યા હતા. તેમણે સૂચના તથા સંચાર મંત્રી ડો. વિક્રમ તિમિલ્સિના સાથે મંત્રાલયમાં મુલાકાત કરીને નેપાળમાં પણ ઇન્ટરનેટ સેવા સંચાલિત કરવાની પોતાની ઈચ્છા દોહરાવી હતી.

તેમણે સ્પષ્ટ કર્યું હતું કે, લાઇસન્સમાં 100 ટકા માલિકી સ્ટારલિંકની હશે તો જ કંપની સેવા શરૂ કરી શકશે. જો આવું શક્ય નહીં બને તો નેપાળમાં સેવા આપવી શક્ય નહીં હોય.

હન્ટરે સંચાર મંત્રાલયથી લઈને દૂરસંચાર પ્રાધિકરણના અધિકારીઓ સાથે અલગ-અલગ સમયે થયેલી બેઠકોમાં કહ્યું હતું કે સ્ટારલિંક કોઈપણ દેશમાં સેવા સંચાલિત કરવા માટે સ્થાનિક ભાગીદાર રાખતી નથી અને ફક્ત 100 ટકા પોતાની માલિકીની કંપની દ્વારા સેવા પ્રદાન કરે છે.