પાકિસ્તાનના બલુચિસ્તાનમાં બસ પર હુમલો, 9 લોકોના મોત

પાકિસ્તાનના દક્ષિણપશ્ચિમ બલુચિસ્તાન પ્રાંતમાં 9 લોકોની હત્યા કરવામાં આવી છે. સશસ્ત્ર માણસોના એક જૂથે બસોમાં મુસાફરી કરી રહેલા આ મુસાફરોનું અપહરણ કર્યું હતું. ત્યારબાદ હુમલાખોરોએ કથિત રીતે બધા 9 લોકોને ગોળી મારી દીધી હતી. આ ઘટના બલુચિસ્તાનના ઝોબ અને લોરાલાઈ જિલ્લાઓની સરહદ પર સ્થિત સુર-દકાઈ વિસ્તારમાં બની હતી.

પાકિસ્તાની મીડિયા અનુસાર, આ બસો પંજાબ પ્રાંત તરફ જઈ રહી હતી. સશસ્ત્ર માણસોના એક જૂથે રસ્તો બ્લોક કરી દીધો હતો અને આ બસોને રોકી હતી. N-70 હાઇવે નજીક સુર-દકાઈ વિસ્તારમાં બસોને રોકવામાં આવી હતી. હુમલાખોરોએ કેટલાક મુસાફરોને ઓળખી કાઢ્યા હતા અને બંદૂકની અણીએ 9 લોકોને બસોમાંથી ઉતારી લીધા હતા. 9 લોકોનું અપહરણ કર્યા પછી, હુમલાખોરોએ બસોને છોડી દીધી હતી.

અહેવાલ મુજબ, એક મુસાફરે કહ્યું, "તેઓએ 9 મુસાફરોને પકડ્યા હતા. એક બસમાંથી 7 અને બીજી બસમાંથી 2. મને ખબર નથી કે તેઓએ તેમની સાથે શું કર્યું, પરંતુ જ્યારે અમે જઈ રહ્યા હતા ત્યારે અમને ગોળીબારનો અવાજ સંભળાયો."

પ્રાંતીય સરકારના પ્રવક્તા શાહિદ રિંદે જણાવ્યું હતું કે ગુરુવારે સાંજે બસોમાંથી મુસાફરોનું અપહરણ કરવામાં આવ્યું હતું. અન્ય એક સરકારી અધિકારી નવીદ આલમે જણાવ્યું હતું કે તેમના મૃતદેહ પહાડીઓમાંથી મળી આવ્યા હતા. તેમના પર ગોળીઓના નિશાન હતા.

અહેવાલ મુજબ, ઝોબના સહાયક કમિશનર નવીદ આલમે ઘટનાની પુષ્ટિ કરી છે. તેમણે કહ્યું કે બસમાંથી અપહરણ કરાયેલા 9 લોકોની હત્યા કરવામાં આવી છે અને તેમના મૃતદેહ મળી આવ્યા છે. તેમણે વધુમાં કહ્યું કે મૃતદેહોને તેમના વતન પંજાબ (પાકિસ્તાન) મોકલવા માટે રાખની લઈ જવામાં આવી રહ્યા છે.