પાસપોર્ટ રેન્કિંગ : આ એશિયન દેશનો પાસપોર્ટ વિશ્વમાં સૌથી શક્તિશાળી, પાકિસ્તાનની હાલત ખરાબ, જાણો ભારતનો નંબર

સિંગાપોરે 2025 માં વિશ્વના સૌથી શક્તિશાળી પાસપોર્ટ તરીકેનો તાજ પાછો મેળવ્યો છે. તેનો પાસપોર્ટ 227 વૈશ્વિક સ્થળોમાંથી 195 સ્થળોએ વિઝા-મુક્ત પ્રવેશ પૂરો પાડે છે. બીજા નંબરે જાપાનનો પાસપોર્ટ છે, જે ૧૯૩ દેશોમાં વિઝા-મુક્ત પ્રવેશની મંજૂરી આપે છે.

નવા હેનલી પાસપોર્ટ ઇન્ડેક્સ રેન્કિંગ અનુસાર, 2024 માં પ્રથમ સ્થાન મેળવ્યા પછી, ફ્રાન્સ, જર્મની, ઇટાલી અને સ્પેન [EU સભ્ય દેશો] બે સ્થાન નીચે ઉતરીને ત્રીજા સ્થાને આવી ગયા છે. ફિનલેન્ડ અને દક્ષિણ કોરિયા પણ તેમની સાથે છે. બધા છ પાસપોર્ટ 2025 સુધીમાં 192 દેશોમાં વિઝા-મુક્ત મુસાફરીની ઓફર કરે છે.

ચોથા નંબર પર યુરોપિયન યુનિયનના સાત દેશો આવે છે - ઑસ્ટ્રિયા, ડેનમાર્ક, આયર્લેન્ડ, લક્ઝમબર્ગ, નેધરલેન્ડ, નોર્વે અને સ્વીડન. આમાંથી કોઈપણ પાસપોર્ટ રાખવાથી 191 દેશોમાં વિઝા-મુક્ત પ્રવેશ મળે છે.

પાંચમા ક્રમે બેલ્જિયમ, પોર્ટુગલ, સ્વિટ્ઝર્લેન્ડ, યુકે અને ન્યુઝીલેન્ડ છે. જો તમારી પાસે આમાંથી કોઈપણ દેશનો પાસપોર્ટ છે, તો તમે 190 દેશોમાં વિઝા ફ્રી મુસાફરી કરી શકો છો.

એક સમયે નંબર વન સ્થાન ધરાવતા બ્રિટિશ પાસપોર્ટની તાકાત સતત ઘટી રહી છે.

સૌથી અગત્યનું, ટોચના પાંચમાંથી યુએસ પાસપોર્ટ ગાયબ છે. આ નવમા નંબરે છે. હાલમાં, યુએસ પાસપોર્ટ ધારકો 186 દેશોમાં વિઝા-મુક્ત પ્રવેશનો આનંદ માણે છે.

આ વર્ષના રેન્કિંગમાં, ભારત 80મા સ્થાનેથી પાંચ સ્થાન નીચે સરકીને 85મા સ્થાને આવી ગયું છે. હવે ભારતીય પાસપોર્ટ દ્વારા 57 દેશોમાં વિઝા ફ્રી મુસાફરી શક્ય છે. ભારતની સાથે, ઇક્વેટોરિયલ ગિની અને નાઇજર પણ 85મા સ્થાને છે.

પાકિસ્તાન સૌથી નીચેના પાંચ દેશોમાં સામેલ છે. પાકિસ્તાન અને યમન 103મા ક્રમે છે. બંને દેશોના પાસપોર્ટ ફક્ત 33 દેશોમાં વિઝા-મુક્ત પ્રવેશ પૂરો પાડે છે.

ઇરાક 104મા ક્રમે છે, સીરિયા 105મા ક્રમે છે. અફઘાનિસ્તાન 106મા ક્રમે છે અને યાદીમાં સૌથી નીચે છે. તેનો પાસપોર્ટ ફક્ત 26 દેશોમાં વિઝા-મુક્ત પ્રવેશ પૂરો પાડે છે.