પીએમ મોદી આજે પેરિસમાં ફ્રાન્સના રાષ્ટ્રપતિ સાથે કરશે વાત, AI એક્શન સમિટની કરશે સહ-અધ્યક્ષતા

પ્રધાનમંત્રી નરેન્દ્ર મોદી આજે મંગળવારે પેરિસમાં ફ્રાન્સનાં રાષ્ટ્રપતિ ઈમેન્યુઅલ મેક્રોન સાથે વાતચીત કરશે. તેમનો ઉદ્દેશ્ય ભારત-ફ્રાન્સ સંબંધોને વધુ મજબૂત બનાવવાનો છે. આ ઉપરાંત, પીએમ મોદી મહત્વપૂર્ણ દ્વિપક્ષીય ચર્ચાઓમાં પણ ભાગ લેશે, જ્યાં ભારત અને ફ્રાન્સ વચ્ચે ઘણા મહત્વપૂર્ણ દ્વિપક્ષીય કરારો પર હસ્તાક્ષર થવાની અપેક્ષા છે.

પીએમ મોદી આજે AI એક્શન સમિટમાં પણ ભાગ લેશે. ભારત આ પરિષદનું સહ-અધ્યક્ષતાપદ સંભાળી રહ્યું છે. આ પરિષદનો ઉદ્દેશ્ય કૃત્રિમ બુદ્ધિમત્તાના ક્ષેત્રમાં વૈશ્વિક ધોરણો સ્થાપિત કરવાનો અને જવાબદાર કૃત્રિમ બુદ્ધિમત્તાના વિકાસને પ્રોત્સાહન આપવાનો છે.  

ઉલ્લેખનીય છે કે AI સમિટ પેરિસ પીસ ફોરમનો એક ભાગ છે. 100થી વધુ દેશોના પ્રતિનિધિઓ અને ખાનગી ક્ષેત્ર સહિત નાગરિક સમાજના 1000 હિસ્સેદારો તેમાં ભાગ લેશે. આ પરિષદ 2023માં UKમાં યોજાયેલી બ્લેચલી પાર્ક એઆઈ સેફ્ટી સમિટથી પ્રેરિત હતી. તે AIથી માનવોને ઉભા થતા જોખમો અંગેની ચિંતાઓ પર ધ્યાન કેન્દ્રિત કરે છે.

આજે સમિટમાં નેતાઓ અને AI ફાઉન્ડેશનની જાહેરાત થવાની અપેક્ષા છે. બંને નેતાઓ ઈન્ડો-ફ્રેન્ચ સીઈઓ ફોરમની સહ-અધ્યક્ષતા પણ કરશે. બંને દેશો વચ્ચેના સંબંધોને વેગ આપવા માટે 2047ના રોડમેપ અનુસાર સંરક્ષણ કરારો સહિત મહત્વપૂર્ણ દ્વિપક્ષીય સોદાઓ પર હસ્તાક્ષર થવાની અપેક્ષા છે. 

પ્રધાનમંત્રીના કાર્યક્રમો - AI માટે વૈશ્વિક ધોરણો નક્કી કરવાથી લઈને વ્યૂહાત્મક ભાગીદારીને મજબૂત બનાવવા સુધી એક સુરક્ષિત, નવીન અને એકબીજા સાથે જોડાયેલા વિશ્વને પ્રોત્સાહન આપવાની ભારતની પ્રતિબદ્ધતા પર ભાર મૂકે છે.આજે સાંજે, પીએમ મોદી ઐતિહાસિક શહેર માર્સેલીની પણ મુલાકાત લેશે જ્યાં તેઓ રાષ્ટ્રપતિ મેક્રોન સાથે અનેક કાર્યક્રમોમાં હાજરી આપશે.