બાંગ્લાદેશમાં પદભ્રષ્ટ પ્રધાનમંત્રી શેખ હસીના અને તેમના સહયોગીઓ સામે વધુ નવ કેસ નોંધાયા

શેખ હસીના અને તેમના સહયોગીઓ સામે વધુ નવ ફરિયાદો દાખલ કરવામાં આવતા નોંધાયેલા કેસોની સંખ્યા વધીને 31 થઈ

બાંગ્લાદેશના પદભ્રષ્ટ પ્રધાનમંત્રી શેખ હસીના અને તેમના સહયોગીઓ સામે વધુ નવ ફરિયાદો દાખલ કરવામાં આવી છે, જેનાથી તેમની સામે નોંધાયેલા કેસોની સંખ્યા વધીને 31 થઈ ગઈ છે. બાંગ્લાદેશ નેશનાલિસ્ટ પાર્ટીના જનરલ સેક્રેટરી મિર્ઝા ફખરુલ ઇસ્લામ આલમગીરે એક અખબારમાં આપેલા નિવેદનમાં કહ્યું કે, ભારત તરફથી અમારી માંગ છે કે શેખ હસીનાને કાયદાકીય માધ્યમથી બાંગ્લાદેશ સરકારને સોંપવામાં આવે. આ દેશની જનતાએ તેના પર કેસ ચલાવવાનું નક્કી કર્યું છે. તેમની સામે કાર્યવાહી કરવામાં આવે.” પદભ્રષ્ટ પ્રધાનમંત્રી શેખ હસીના વિરુદ્ધ નોંધાયેલા કેસોમાં હત્યાના 26, માનવતા અને નરસંહારના 4 ગુના અને અપહરણના 1 સહિતના કેસોનો સમાવેશ થાય છે.

હેફાઝત-એ-ઈસ્લામના સંયુક્ત મહાસચિવ (શિક્ષણ અને કાયદા) મુફ્તી હારુન ઈઝહર ચૌધરીની તરફથી સુપ્રીમ કોર્ટના વકીલ ગાઝી એમએચ તમિમએ બાંગ્લાદેશના ઈન્ટરનેશનલ ક્રિમિનલ ટ્રિબ્યુનલમાં ફરિયાદ દાખલ કરી હતી. ફરિયાદમાં હસીના અને અન્ય 23 લોકો પર 5 મે, 2013ના રોજ મોતીઝીલના શાપલા છતર ખાતે હેફાઝત-એ-ઈસ્લામની રેલી દરમિયાન માનવતા અને નરસંહારના ગુનાનો આરોપ મૂકવામાં આવ્યો છે. ઈન્ટરનેશનલ ક્રિમિનલ ટ્રિબ્યુનલમાં દાખલ કરવામાં આવેલી આ ચોથી ફરિયાદ છે જેમાં પૂર્વ પ્રધાનમંત્રીને આરોપી બનાવવામાં આવ્યા છે. સરકારી નોકરીઓમાં વિવાદાસ્પદ અનામત પ્રથાને લઈને તેમની સરકાર સામે ભારે વિરોધને પગલે શેખ હસીનાએ 5 ઓગસ્ટના રોજ પ્રધાનમંત્રી પદ પરથી રાજીનામું આપી દીધું હતું અને દેશ છોડીને ભારત પહોંચ્યા હતા. ચારમાંથી ત્રણ કેસ અનામત આંદોલન પર કેન્દ્રિત તાજેતરની હિંસા સાથે સંબંધિત છે.

આ ઉપરાંત, મંગળવારે દેશભરમાં અવામી લીગના અધ્યક્ષ વિરૂદ્ધ વધુ આઠ કેસ નોંધવામાં આવ્યા હતા, જેમાં તાજેતરના વિરોધ દરમિયાન થયેલી હત્યાઓના સંબંધમાં તેના પર આરોપ મૂકવામાં આવ્યો હતો. હસીનાના પુત્ર સજીબ વાજેદ જોય, પુત્રી સાયમા વાજેદ પુતુલ અને બહેન શેખ રેહાનાને પહેલીવાર હત્યાના કેસમાં સહ-આરોપી બનાવવામાં આવ્યા છે. હેફાઝત-એ-ઈસ્લામ કેસના મુખ્ય આરોપીઓમાં અવામી લીગના મહાસચિવ અને ભૂતપૂર્વ માર્ગ પરિવહન અને પુલ પ્રધાન ઉબેદ-ઉલ કાદિર, ભૂતપૂર્વ પ્રધાન રાશિદ ખાન મેનન, ઢાકા દક્ષિણ સિટી કોર્પોરેશનના ભૂતપૂર્વ મેયર શેખ ફઝલે નૂર તાપોશ, ભૂતપૂર્વ સલાહકાર શેખ ફઝલે નૂરનો સમાવેશ થાય છે.  આ સિવાય કેટલાક મંત્રીઓ, રાજ્યના મંત્રીઓ અને સાંસદો, કાયદા અમલીકરણ એજન્સીઓના અજાણ્યા વ્યક્તિઓ અને ઇલેક્ટ્રોનિક અને પ્રિન્ટ મીડિયાના કેટલાક અગાઉના નીતિ નિર્માતાઓને પણ આ કેસમાં આરોપી બનાવવામાં આવ્યા છે.