બ્રિટિશ ચૂંટણીમાં લેબર પાર્ટીને જંગી બહુમતીની ધારણા

બ્રિટનની સામાન્ય ચૂંટણીમાં વર્તમાન પ્રધાનમંત્રી ઋષિ સુનકને મોટો ઝટકો લાગ્યો છે. કીર સ્ટારમરની પાર્ટી મોટી જીત તરફ આગળ વધી રહી છે. એક્ઝિટ પોલ્સે ઋષિ સુનકના કપાળ પર ચિંતાની રેખાઓ દોરી છે. સર્વે અનુસાર 650 સીટોવાળી સંસદમાં લેબર પાર્ટી 410 સીટો જીતશે. આ સાથે કન્ઝર્વેટિવ પાર્ટીના નેતૃત્વમાં 14 વર્ષની લાંબી સરકારનો અંત આવશે. સુનકની પાર્ટીને માત્ર 131 સીટો મળવાનો અંદાજ છે. 

એક્ઝિટ પોલ અનુસાર લેબર પાર્ટીના નેતા કીર સ્ટારમર બ્રિટનના આગામી પ્રધાનમંત્રી હશે. એક્ઝિટ પોલ્સ સંસદીય ચૂંટણીમાં ઋષિ સુનકની કન્ઝર્વેટિવ પાર્ટી માટે ઐતિહાસિક હારનો સંકેત આપે છે. બ્રિટનમાં એક્ઝિટ પોલના પરિણામો સામાન્ય રીતે સાચા નીકળે છે. બ્રિટનમાં યોજાયેલી છેલ્લી છ રાષ્ટ્રીય ચૂંટણીઓમાંથી માત્ર 2015ના એક્ઝિટ પોલે ખોટા પરિણામો આપ્યા છે.

પ્રધાનમંત્રી ઋષિ સુનકે મે મહિનામાં ત્વરિત ચૂંટણીની જાહેરાત કરીને બધાને આશ્ચર્યચકિત કર્યા હતા, કારણ કે કન્ઝર્વેટિવ્સ મતદાનમાં લગભગ 20 પોઈન્ટથી લેબર પાર્ટીથી પાછળ હતા. સુનકે આશા વ્યક્ત કરી હતી કે ચૂંટણી સ્કોર્સમાં આ તફાવત ઘટાડશે, પરંતુ તેની વિપરીત અસર થઈ. ચૂંટણીની જાહેરાત થઈ ત્યારથી તમામનું ધ્યાન પ્રધાનમંત્રીની કન્ઝર્વેટિવ પાર્ટી તેમજ લેબર પાર્ટીના ઉમેદવાર અને વિપક્ષી નેતા કીર સ્ટારર પર છે.