ભારતીય રક્ષા સચિવે બર્લિનમાં ભારત-જર્મની ઉચ્ચ સંરક્ષણ સમિતિની બેઠકની સહ-અધ્યક્ષતા કરી

ભારતના સંરક્ષણ સચિવ ગિરધર અરમાને બર્લિનમાં ભારત-જર્મની ઉચ્ચ સંરક્ષણ સમિતિની બેઠકની સહ-અધ્યક્ષતા કરી હતી. બંને દેશોએ સંરક્ષણ ક્ષેત્રમાં ઉચ્ચ ટેકનોલોજીમાં સહયોગ પર ધ્યાન કેન્દ્રિત કર્યું. ઉલ્લેખનીય છે કે 2023માં જર્મન રક્ષા મંત્રી બોરિસ પિસ્ટોરિયસની ભારત મુલાકાત બાદ ઉચ્ચ સંરક્ષણ સમિતિની બેઠકનું આયોજન કરવામાં આવ્યું છે.

ભારતના સંરક્ષણ સચિવ ગિરધર અરમાનેએ મંગળવારે (27 ફેબ્રુઆરી) બર્લિનમાં જર્મન સંરક્ષણ મંત્રાલયના સચિવ બેનેડિક્ટ ઝિમર સાથે ભારત-જર્મની ઉચ્ચ સંરક્ષણ સમિતિ (HDC)ની બેઠકની સહ-અધ્યક્ષતા કરી હતી, એમ સંરક્ષણ મંત્રાલય દ્વારા જારી કરાયેલા એક નિવેદનમાં જણાવવામાં આવ્યું હતું. બંને પક્ષોએ ભારત અને જર્મની વચ્ચે વ્યૂહાત્મક ભાગીદારીના મુખ્ય આધારસ્તંભ તરીકે સંરક્ષણ સહયોગ વિકસાવવા પર ધ્યાન કેન્દ્રિત કર્યું. બંને દેશોના સંરક્ષણ સચિવોએ ઘણા દ્વિપક્ષીય સુરક્ષા અને સંરક્ષણ મુદ્દાઓ પર પણ ચર્ચા કરી હતી.

મંત્રાલયની અખબારી યાદીમાં જણાવાયું છે કે, બંને પક્ષોએ પ્રાદેશિક સુરક્ષા સ્થિતિ પર પણ મંતવ્યોનું આદાન-પ્રદાન કર્યું અને ઈન્ડો-પેસિફિક ક્ષેત્રમાં જર્મની સાથે સંભવિત સંયુક્ત કવાયત અંગે ચર્ચા કરી હતી. આ ઉપરાંત સંભવિત સંરક્ષણ ઔદ્યોગિક પ્રોજેક્ટ્સ અને દરખાસ્તો પર પણ ચર્ચા કરવામાં આવી હતી. તેમણે મજબૂત સંરક્ષણ ભાગીદારી અને બંને દેશોના સંરક્ષણ ઉદ્યોગોને એકસાથે લાવવાની જરૂરિયાત પર ભાર મૂક્યો હતો. તેમજ સંરક્ષણ ક્ષેત્રે ઉચ્ચ ટેકનોલોજીમાં ભાગીદારી પર વિશેષ ધ્યાન આપવામાં આવ્યું હતું.