રક્ષામંત્રી રાજનાથ સિંહે ઓસ્ટ્રેલિયાના રક્ષામંત્રી સાથે ટેલિફોન પર દ્વિપક્ષીય ચર્ચા કરી

રક્ષા મંત્રી રાજનાથ સિંહે ગુરુવારે ઓસ્ટ્રેલિયાના રક્ષામંત્રી રિચર્ડ માર્લ્સ સાથે ટેલિફોન પર વાત કરી હતી. ઈન્ડો-પેસિફિકમાં બંને દેશો વચ્ચે ગાઢ સહકાર પર ધ્યાન કેન્દ્રિત કરીને બંને નેતાઓ વચ્ચે દ્વિપક્ષીય સંરક્ષણ સહયોગ સંબંધિત વિવિધ મુદ્દાઓની સમીક્ષા કરવામાં આવી હતી. રક્ષામંત્રીએ કહ્યું, "અમે ભારત-ઓસ્ટ્રેલિયા વ્યાપક વ્યૂહાત્મક ભાગીદારીને ખૂબ મહત્વ આપીએ છીએ."

ટેલિફોનિક વાતચીતમાં, બંને પ્રધાનોએ વ્યાપક વ્યૂહાત્મક ભાગીદારી હેઠળ સંરક્ષણ સહકારમાં પરિવર્તનકારી પ્રગતિની નોંધ લીધી, એમ રક્ષા મંત્રાલય દ્વારા જાહેર કરાયેલા એક નિવેદનમાં જણાવાયું હતું. વાટાઘાટો દરમિયાન, છેલ્લી ભારત-ઓસ્ટ્રેલિયા 2+2 મંત્રી સ્તરીય સંવાદ પછી સંબંધોમાં આવેલી ગતિની પ્રશંસા કરવામાં આવી હતી. બંને મંત્રીઓએ નવેમ્બર, 2023માં આ દ્વિપક્ષીય બેઠકમાં ભાગ લીધો હતો. ઑસ્ટ્રેલિયાએ 2024માં રિલીઝ થનારી રાષ્ટ્રીય સંરક્ષણ વ્યૂહરચના દસ્તાવેજમાં ભારતને ટોચના સ્તરના સુરક્ષા ભાગીદાર તરીકે ઓળખાવ્યું છે. તમને જણાવી દઈએ કે, ઓસ્ટ્રેલિયાના રક્ષા મંત્રી પાસે નાયબ પ્રધાનમંત્રીનું પણ પદ છે.

ઓસ્ટ્રેલિયાના રક્ષા મંત્રી રિચર્ડ માર્લ્સે રાજનાથ સિંહને સતત બીજી ટર્મ માટે રક્ષા મંત્રી તરીકેનો કાર્યભાર સંભાળવા બદલ અભિનંદન પાઠવ્યા હતા. તેમણે ભારતીય લોકશાહી પ્રણાલીની કામગીરીની પ્રશંસા કરી જેમાં લોકોએ મોટી સંખ્યામાં મતદાન કર્યું. તેણે ટીમ ઈન્ડિયાને T-20 વર્લ્ડ ચેમ્પિયન બનવા પર રક્ષા મંત્રીને પણ અભિનંદન પાઠવ્યા હતા.