રશિયામાં રાષ્ટ્રપતિની ચૂંટણી માટે મતદાન શરૂ 

રશિયામાં રાષ્ટ્રપતિની ચૂંટણી માટે મતદાન શરૂ થઈ ગયું છે. આગામી ત્રણ દિવસમાં નાગરિકો આગામી છ વર્ષ માટે તેમના નવા રાષ્ટ્રપતિની પસંદગી કરશે. પ્રથમ વખત, ડોનબાસ અને નોવોરોસિયાના રહેવાસીઓ આ ચૂંટણીમાં ભાગ લેશે. રશિયાની સત્તાવાર સમાચાર એજન્સી તાસના અહેવાલમાં મતદાનની શરૂઆતની વિગતો આપવામાં આવી છે.

રશિયાના દૂર પૂર્વીય પ્રદેશો, ખાસ કરીને પૂર્વીય કામચાટકા અને ચુકોત્કાના મતદાન મથકોમાં હાલમાં મતદાન થઈ રહ્યું છે. કામચટકાના ગવર્નર વ્લાદિમીર સોલોડોવ મતદાન કરનાર પ્રથમ હતા. આધુનિક રશિયાના ઈતિહાસમાં આ આઠમી ચૂંટણી છે. મેદાનમાં રહેલા ઉમેદવારોમાં વ્લાદિસ્લાવ દાવાન્કોવ (ન્યૂ પીપલ્સ પાર્ટી), આઉટગોઇંગ પ્રેસિડેન્ટ વ્લાદિમીર પુતિન, એલડીપીઆર પાર્ટીના લિયોનીદ સ્લુત્સ્કી અને નિકોલે ખારીતોનોવ (રશિયાની સામ્યવાદી પાર્ટી) છે.

રશિયામાં પ્રથમ વખત રાષ્ટ્રપતિની ચૂંટણી માટે મતદાન ત્રણ દિવસ સુધી ચાલશે. રશિયન ચૂંટણી પંચના અધ્યક્ષ એલા પમ્ફિલોવાના જણાવ્યા અનુસાર, દેશના 94,000 થી વધુ મતદાન મથકો સવારે 8:00 થી સાંજના 8:00 વાગ્યા સુધી ખુલ્લા રહેશે. થાઇલેન્ડ એ પહેલો દેશ હશે જ્યાં ફૂકેટમાં રશિયન કોન્સ્યુલેટ જનરલના પ્રદેશ પર મતદાન મથકો ખુલશે.

પ્રથમ વખત મતદારોને ઈલેક્ટ્રોનિક વોટિંગનો વિકલ્પ આપવામાં આવ્યો છે. મોસ્કો સહિત 29 પ્રદેશોમાં ઓનલાઈન વોટિંગની સુવિધા આપવામાં આવી છે. 4.7 મિલિયનથી વધુ લોકોએ ઓનલાઈન મત આપવા માટે અરજી કરી છે. ઓનલાઈન વોટિંગના પરિણામો પહેલા આવશે.