વિદેશ મંત્રી એસ.જયશંકરે કતાર દુર્ઘટનામાં 12 ભારતીયોનાં મોત પર શોક વ્યક્ત કર્યો

કતારના રાસ લાફાન ઇન્ડસ્ટ્રિયલ સિટીમાં થયેલા ભયાનક અકસ્માતમાં 12 ભારતીય નાગરિકોના મોત થયા છે. દોહા સ્થિત ભારતીય દૂતાવાસે આ ઘટનાની પુષ્ટિ કરતા પીડિત પરિવારો પ્રત્યે સંવેદના વ્યક્ત કરી છે. ભારતના વિદેશ મંત્રી ડૉ. એસ. જયશંકરે પણ આ ઘટના પર શોક વ્યક્ત કર્યો છે.

વિદેશ મંત્રી ડૉ. એસ. જયશંકરે સોશિયલ મીડિયા પ્લેટફોર્મ X પર લખ્યું, "કતારના રાસ લાફાન ઇન્ડસ્ટ્રિયલ સિટીમાં થયેલા વિસ્ફોટમાં ભારતીય નાગરિકો સહિત અનેક લોકોના મોત અને ઘાયલ થવાના સમાચારથી ખૂબ જ દુઃખ થયું છે. જેમ જેમ વધુ માહિતી સામે આવી રહી છે, અમારું દૂતાવાસ કતારના સત્તાવાળાઓના સંપર્કમાં છે અને આ અકસ્માતથી પ્રભાવિત ભારતીય નાગરિકોના પરિવારોને મદદ કરવાનો પ્રયાસ કરી રહ્યું છે. અમારી પ્રાર્થના પીડિતો અને તેમના પરિવારો સાથે છે." 

કતારના દોહામાં સ્થિત ભારતીય દૂતાવાસના અધિકારીઓએ X પર એક પોસ્ટ દ્વારા પુષ્ટિ કરી છે કે, "રવિવારે રાત્રે રાસ લાફાન ઇન્ડસ્ટ્રિયલ સિટીમાં થયેલા અકસ્માતમાં 12 ભારતીય નાગરિકોના કમનસીબ મોત થયા છે. અમે આ દુઃખની ઘડીમાં મૃતકોના પરિવારો પ્રત્યે ઊંડી સંવેદના વ્યક્ત કરીએ છીએ અને દિવંગત આત્માઓની શાંતિ માટે પ્રાર્થના કરીએ છીએ." 

અધિકારીઓએ જણાવ્યું હતું કે અકસ્માતમાં ઘાયલ થયેલા તમામ લોકોની હાલત હાલ સ્થિર છે અને તેમને યોગ્ય સારવાર આપવામાં આવી રહી છે. દૂતાવાસ કતારના સત્તાવાળાઓ સાથે સતત સંપર્કમાં છે અને અસરગ્રસ્તોને તમામ શક્ય મદદ પૂરી પાડી રહ્યું છે, જેમાં મૃતકોના મૃતદેહોને વહેલી તકે ભારત મોકલવાની વ્યવસ્થા પણ સામેલ છે. 

રવિવારે રાત્રે, વિશ્વના સૌથી મહત્વપૂર્ણ ઊર્જા હબ પૈકીના એક, રાસ લાફાન ઇન્ડસ્ટ્રિયલ એરિયામાં વિસ્ફોટ થયો હતો. આ વિસ્ફોટ ત્યારે થયો જ્યારે કામ ફરી શરૂ કરવાનો પ્રયાસ કરવામાં આવી રહ્યો હતો. આ ઘટના બાદ બરઝાન ગેસ સપ્લાય લાઇન પર ભીષણ આગ ફાટી નીકળી હતી, ત્યારબાદ ઇમરજન્સી રિસ્પોન્સ ટીમો તાત્કાલિક ઘટનાસ્થળે પહોંચી ગઈ હતી.