વ્હાઇટ હાઉસનો મોટો નિર્ણય: ચૂંટણી સુધારા માટે 'સેવ અમેરિકા એક્ટ' લાવવાની તૈયારી

વ્હાઇટ હાઉસે કોંગ્રેસને રાષ્ટ્રપતિ ડોનાલ્ડ ટ્રમ્પ દ્વારા પ્રસ્તાવિત વ્યાપક ચૂંટણી સુધારા પસાર કરવા વિનંતી કરી છે. સરકારનું કહેવું છે કે આ કાયદો મતદાનની વિશ્વસનીયતા મજબૂત કરશે અને સુનિશ્ચિત કરશે કે માત્ર અમેરિકન નાગરિકો જ દેશની ચૂંટણીમાં ભાગ લે.

વ્હાઇટ હાઉસના બ્રીફિંગમાં પ્રેસ સેક્રેટરી કેરોલિન લીવિટે 'સેવ અમેરિકા એક્ટ'ને "રાષ્ટ્રના ઇતિહાસના સૌથી મહત્વપૂર્ણ કાયદાઓમાંનો એક" ગણાવ્યો હતો. તેમણે ઉમેર્યું કે, "આ એક્ટ તમામ અમેરિકનોમાં લોકપ્રિય છે કારણ કે તેની દરેક જોગવાઈ સામાન્ય જ્ઞાન અને તર્ક પર આધારિત છે."

આ કાયદાની 5 મુખ્ય જોગવાઈઓ:
વોટર આઈડી ફરજિયાત: દરેક મતદારે મતદાન કરતા પહેલા પોતાની ઓળખ (ID) બતાવવી પડશે. લીવિટના જણાવ્યા અનુસાર, 90% અમેરિકનો અને 80% ડેમોક્રેટિક મતદારો પણ આ જોગવાઈના સમર્થનમાં છે.

નાગરિકતાનો પુરાવો: મતદાર તરીકે નોંધણી કરાવતી વખતે અમેરિકન નાગરિક હોવાનો પુરાવો આપવો અનિવાર્ય બનશે. ગેરકાયદેસર ઇમિગ્રેશનના વધતા પ્રવાહને જોતા આ પગલું જરૂરી ગણાવાયું છે.

મેલ-ઇન બેલેટ પર પ્રતિબંધ: સાર્વત્રિક રીતે ઘરે બેઠા ટપાલ દ્વારા મતદાન કરવાની પદ્ધતિ (Mail-in ballots) નાબૂદ કરવામાં આવશે. જોકે, બીમારી, અપંગતા, સૈન્ય સેવા અથવા મુસાફરી જેવા ખાસ કિસ્સાઓમાં છૂટછાટ આપવામાં આવશે.

મહિલા રમતોમાં સુરક્ષા: આ એક્ટ હેઠળ જૈવિક પુરુષોને મહિલાઓની રમતગમત સ્પર્ધાઓમાં ભાગ લેવા પર કાયમી પ્રતિબંધ મૂકવામાં આવશે.

બાળકો માટે જેન્ડર સર્જરી પર પ્રતિબંધ: સગીરો માટે ટ્રાન્સજેન્ડર મ્યુટેશન સર્જરી પર પ્રતિબંધ મૂકવાની જોગવાઈ પણ આ કાયદામાં સામેલ છે.

લીવિટે બંને પક્ષોના ધારાસભ્યોને આ કાયદાને ટેકો આપવા અપીલ કરી છે. તેમણે કહ્યું કે, "ચૂંટણીની પવિત્રતા જાળવવા અને લોકશાહીના રક્ષણ માટે રિપબ્લિકન અને ડેમોક્રેટ્સ બંને માટે આ સૌથી મહત્વનું કામ છે." રાષ્ટ્રપતિ ટ્રમ્પ ઈચ્છે છે કે કોંગ્રેસ આ બિલ તાત્કાલિક પસાર કરીને તેમની પાસે હસ્તાક્ષર માટે મોકલે.