સ્પેનમાં આવેલા વિનાશક પૂરમાં 150 થી વધુ લોકોએ જીવ ગુમાવ્યા, હાલમાં, પરિસ્થિત બેકાબૂ

બચાવકર્મીઓને લોકોને સુરક્ષિત રીતે બહાર કાઢવામાં ઘણી મુશ્કેલીઓ

સ્પેનમાં આવેલા ભારે પૂરથી મૃત્યુઆંક 31 ઓક્ટોબર સુધીમાં 150 થી વધુ થઈ ગયો છે. ભારે પૂર આવવાથી મોટી સંખ્યામાં લોકો ગુમ થયા છે અને બચાવ ટુકડીઓ તેમને શોધવામાં વ્યસ્ત છે. ગુમ થયેલા લોકોને જોતા મૃત્યુઆંક વધવાની આશંકા છે. આ આપત્તિ છેલ્લા કેટલાક દાયકાઓમાં યુરોપની સૌથી ખરાબ આપત્તિ બની શકે છે.

બચાવકર્મીઓને લોકોને સુરક્ષિત રીતે બહાર કાઢવામાં ઘણી મુશ્કેલીઓ

સ્પેનના પૂર્વ અને દક્ષિણ ભાગોમાં મંગળવારથી શરૂ થયેલા મુશળધાર વરસાદને કારણે પૂરની સ્થિતિ વધુ વણસી ગઈ હતી. પૂરગ્રસ્ત વિસ્તારમાં મોટી સંખ્યામાં લોકોને સુરક્ષિત વિસ્તારોમાં પહોંચવા માટે સંઘર્ષ કરવો પડ્યો હતો. આ વિસ્તારોમાં રેલ અને રોડ માર્ગો ખરાબ રીતે પ્રભાવિત થવાને કારણે શરૂઆતમાં બચાવકર્મીઓને લોકોને સુરક્ષિત રીતે બહાર કાઢવામાં ઘણી મુશ્કેલીઓનો સામનો કરવો પડ્યો હતો.

પીડિતોને મદદ કરવા માટે દરેક શક્ય પ્રયાસો કરવાની ખાતરી

સ્પેનના રાષ્ટ્રપતિ પેડ્રો સાંચેઝે કહ્યું કે ઘણા શહેરો પૂરથી પ્રભાવિત થયા છે. તમામ જરૂરી સંસાધનોનો ઉપયોગ કરવામાં આવી રહ્યો છે, જેથી કરીને દેશ આ દુર્ઘટનામાંથી બહાર આવી શકે. તેમણે પૂર પીડિતોને મદદ કરવા માટે દરેક શક્ય પ્રયાસો કરવાની ખાતરી આપી હતી અને લોકોને સતર્ક રહેવા વિનંતી કરી હતી.

1,100 સૈન્ય જવાનોને પણ પૂરગ્રસ્ત વિસ્તારોમાં તૈનાત કરવામાં આવ્યા

બચાવ કાર્યમાં મદદ કરવા માટે સરકારે કટોકટી સમિતિની રચના કરી છે. પોલીસ અને બચાવ કાર્યકરો હેલિકોપ્ટરની મદદથી પૂરગ્રસ્ત વિસ્તારમાંથી લોકોને બહાર કાઢી રહ્યા છે. બચાવ કાર્યકરો ઉપરાંત 1,100 સૈન્ય જવાનોને પણ પૂરગ્રસ્ત વિસ્તારોમાં તૈનાત કરવામાં આવ્યા છે.