કેન્દ્રીય મંત્રી સ્મૃતિ ઈરાનીએ ભારત અને સાઉદી અરેબિયા વચ્ચેના હજ કરાર 2024 પર કર્યા હસ્તાક્ષર

કેન્દ્રીય લઘુમતી બાબતોના મંત્રી સ્મૃતિ ઈરાનીએ રવિવારે ભારત અને સાઉદી અરેબિયા વચ્ચે હજ કરાર 2024 પર હસ્તાક્ષર કર્યા.

કેન્દ્રીય લઘુમતી બાબતોના મંત્રી સ્મૃતિ ઈરાનીએ રવિવારે ભારત અને સાઉદી અરેબિયા વચ્ચે હજ કરાર 2024 પર હસ્તાક્ષર કર્યા. આ પ્રસંગે કેન્દ્રીય મંત્રી સ્મૃતિ ઈરાની અને વિદેશ અને સંસદીય બાબતોના રાજ્ય મંત્રી વી. મુરલીધરને સાઉદીના હજ અને ઉમરાહ મંત્રી ડૉ. તૌફિક બિન ફૌઝાન અલ-રબિયા સાથે દ્વિપક્ષીય હજ કરાર પર હસ્તાક્ષર કર્યા હતા.

કેન્દ્રીય અલ્પસંખ્યક બાબતોના મંત્રી સ્મૃતિ ઈરાની બંને દેશો વચ્ચે હજ કરાર 2024 પર હસ્તાક્ષર કરવા અને હજ કોન્ફરન્સમાં હાજરી આપવા માટે રવિવારે બે દિવસની મુલાકાતે જેદ્દાહ પહોંચ્યા હતા. જેદ્દાહ એરપોર્ટ પર ભારતીય રાજદૂત ડો. સુહેલ ખાન, કોન્સ્યુલ જનરલ મોહમ્મદ શાહિદ અને સાઉદી હજ અને ઉમરાહ મંત્રાલયના અધિકારીઓ દ્વારા મંત્રીનું સ્વાગત કરવામાં આવ્યું હતું.

જેદ્દાહમાં ભારતીય કોન્સ્યુલેટ જનરલે કહ્યું કે તાજેતરના વર્ષોમાં ભારત અને સાઉદી અરેબિયા વચ્ચેની ભાગીદારી વિવિધ ક્ષેત્રોમાં ગાઢ બની છે. આ મુલાકાત બંને દેશો વચ્ચે વ્યૂહાત્મક ભાગીદારીને વધુ મજબૂત કરશે. મુલાકાત દરમિયાન, કેન્દ્રીય પ્રધાન સાઉદી અરેબિયાના હજ અને ઉમરાહ પ્રધાન તૌફિક બિન ફૌઝાન અલ રાબિયા સાથે આગામી હજ યાત્રા સંબંધિત પરસ્પર હિતના મુદ્દાઓ પર ચર્ચા કરવા માટે દ્વિપક્ષીય બેઠક કરશે.

ઈરાની સોમવારે સાઉદી અરેબિયાના હજ અને ઉમરા મંત્રાલય દ્વારા જેદ્દાહમાં આયોજિત હજ અને ઉમરા સંમેલનની ત્રીજી આવૃત્તિના ઉદ્ઘાટન સમારોહમાં હાજરી આપશે. કેન્દ્રીય મંત્રી હજ કરાર 2024 પર હસ્તાક્ષર અને વાટાઘાટો દરમિયાન ભારતીય પ્રતિનિધિમંડળનું નેતૃત્વ કરશે. આ પ્રતિનિધિમંડળ સાઉદી અરેબિયામાં ભારતીય ઉદ્યોગપતિઓ અને ભારતીય પ્રવાસીઓને પણ મળશે.