છત્તીસગઢમાં સુરક્ષા દળોની સફળતા, નક્સલવાદ માટે વધુ એક મોટો ફટકો

છત્તીસગઢના ગરિયાબંદ જિલ્લામાં એન્કાઉન્ટર દરમ્યાન 14 નક્સલીઓ માર્યા ગયા બાદ, કેન્દ્રીય ગૃહમંત્રી અમિત શાહે સુરક્ષા દળોના પ્રયાસોની પ્રશંસા કરી. તેમણે કહ્યું કે, આ નક્સલવાદ માટે બીજો મોટો ફટકો છે. આપણા સુરક્ષા દળોએ નક્સલ મુક્ત ભારત બનાવવા તરફ મોટી સફળતા મેળવી છે.

ગૃહમંત્રીએ એક પોસ્ટમાં કહ્યું, "નક્સલવાદને બીજો મોટો ફટકો". આપણા સુરક્ષા દળોએ ઓડિશા-છત્તીસગઢ સરહદ પર સીઆરપીએફ, એસઓજી ઓડિશા અને છત્તીસગઢ પોલીસે સંયુક્ત કાર્યવાહીમાં 14 નક્સલીઓને ઠાર માર્યા. નક્સલ મુક્ત ભારત માટેના આપણા સંકલ્પ અને સુરક્ષા દળોના સંયુક્ત પ્રયાસોને કારણે, આજે નક્સલવાદ તેના અંતિમ શ્વાસ લઈ રહ્યું છે. છત્તીસગઢના ગરિયાબંધ જિલ્લાના ભાલુ ડીગ્ગી જંગલમાં સુરક્ષા દળો અને નક્સલીઓ વચ્ચે થયેલી અથડામણમાં અત્યાર સુધીમાં 14 નક્સલીઓ માર્યા ગયા છે, એમ એક અધિકારીએ જણાવ્યું હતું. તેમાં એક કરોડ રૂપિયાનું ઈનામ ધરાવતો નક્સલી જયરામ ઉર્ફે ચલપતિ પણ માર્યો ગયો. એન્કાઉન્ટર દરમિયાન, સુરક્ષા દળોએ શસ્ત્રો પણ જપ્ત કર્યા, જેમાં એસએલઆર રાઇફલ્સ જેવા સ્વચાલિત શસ્ત્રોનો સમાવેશ થાય છે. આ નક્સલ વિરોધી સર્ચ ઓપરેશનમાં ગારિયાબંદ ઓપરેશન ગ્રુપ ઈ-30, કોબ્રા 207, સીઆરપીએફની 65 અને 211 બટાલિયન અને એસઓજી નુઆપાડાની સંયુક્ત ટીમનો સમાવેશ થતો હતો.