તમિલનાડુ-આંધ્રપ્રદેશની સરહદ પર કાદવમાં ફસાયેલા હાથીનો સફળ રેસ્ક્યુ

તમિલનાડુ અને આંધ્રપ્રદેશના વન વિભાગના અધિકારીઓએ રવિવારે એક સંઘર્ષ કરી રહેલા હાથીને કાદવમાંથી બચાવીને માનવતાનું ઉત્તમ ઉદાહરણ પૂરું પાડ્યું હતું.

આ ઘટના વેલ્લોર જિલ્લાના ગુડિયાથમ નજીક ભરતરામી ટીબી પલયમ ખાતે બે રાજ્યોની સરહદ પર સ્થિત એક તળાવમાં બની હતી. હાથી તળાવના કાદવવાળા પાણીમાં ઊંડે સુધી ફસાઈ ગયો હતો અને બહાર નીકળવા માટે સંઘર્ષ કરી રહ્યો હતો. સ્થાનિક રહેવાસીઓએ હાથીને મુશ્કેલીમાં જોયો અને તાત્કાલિક સ્થાનિક વન વિભાગના અધિકારીઓને જાણ કરી હતી.

માહિતી મળતાં જ બંને રાજ્યોના વન વિભાગના અધિકારીઓની ટીમ ઘટનાસ્થળે પહોંચી ગઈ હતી. હાથીનું કદ અને કાદવની ઊંડાઈ જોતાં, અધિકારીઓએ ખોદકામ કરવાના મશીન (Excavator)નો ઉપયોગ કરીને કાદવને દૂર કરવાનો અને હાથી માટે બહાર નીકળવાનો રસ્તો બનાવવાનો નિર્ણય લીધો હતો.સંયુક્ત પ્રયાસો અને લાંબી જહેમત બાદ હાથીને સફળતાપૂર્વક કાદવમાંથી બહાર કાઢવામાં આવ્યો હતો. આ સફળ રેસ્ક્યુ ઓપરેશન બાદ વન વિભાગના અધિકારીઓએ રાહતનો શ્વાસ લીધો હતો, જ્યારે સ્થાનિક રહેવાસીઓએ વન્યજીવ સંરક્ષણ માટે અધિકારીઓની પ્રતિબદ્ધતાને બિરદાવી હતી.