દિલ્હીમાં BRICS શિખર સંમેલનનો બીજો દિવસ, સુરક્ષાની કડક વ્યવસ્થા

દિલ્હીના ભારત મંડપમ ખાતે આયોજિત 18મા બ્રિક્સ (BRICS) શિખર સંમેલનનો આજે રવિવારે બીજો અને અંતિમ દિવસ છે. વિદેશી મહેમાનોના સ્વાગત માટે ભારત મંડપમ સંપૂર્ણ રીતે તૈયાર છે અને સુરક્ષાની ચુસ્ત વ્યવસ્થા ગોઠવવામાં આવી છે. ઉલ્લેખનીય છે કે, ભારત ચોથી વખત આ વૈશ્વિક સંમેલનનું યજમાનપદ સંભાળી રહ્યું છે.

આ શનિવારે શરૂ થયેલા આ સંમેલનમાં તમામ BRICS દેશોની સહમતિથી 'નવી દિલ્હી ઘોષણાપત્ર 2026' જાહેર કરવામાં આવ્યો હતો. આ ઢંઢેરામાં BRICS દેશોએ આંતરરાષ્ટ્રીય વિવાદોને શાંતિપૂર્ણ રીતે ઉકેલવા માટે પરસ્પર સંવાદ, સલાહ-મસલત અને કૂટનીતિક પ્રયાસો પ્રત્યે પોતાની કટિબદ્ધતા દોહરાવી હતી. આ સાથે જ પશ્ચિમ એશિયામાં વધી રહેલા તણાવ અંગે ચિંતા વ્યક્ત કરીને તમામ પક્ષોને સંયમ જાળવવા અને સ્થિતિ વધુ બગડે તેવા પગલાંથી બચવા અપીલ કરવામાં આવી હતી.

ભારત-ચીન સંબંધો પર શી જિનપિંગનું મહત્વનું નિવેદન
બીજી તરફ, ચીનના વિદેશ મંત્રાલય દ્વારા જાહેર કરાયેલા નિવેદન અનુસાર, ચીનના રાષ્ટ્રપતિ શી જિનપિંગે ભારત-ચીન સંબંધો અંગે મહત્વની બાબતો કહી હતી. તેમણે જણાવ્યું હતું કે, બંને દેશોએ માનવતાના ભવિષ્ય અને પોતાના લોકોના કલ્યાણને પ્રાથમિકતા આપવી જોઈએ. સાથે મળીને BRICS સહયોગને વધુ મજબૂત બનાવવો જોઈએ અને વિશ્વ શાંતિ, સ્થિરતા તથા સમૃદ્ધિમાં સકારાત્મક ભૂમિકા ભજવવી જોઈએ.

ચીની રાષ્ટ્રપતિએ આપ્યા 4 મુખ્ય સૂચનો:
1. યોગ્ય વ્યૂહાત્મક સમજ: ભારત અને ચીન એકબીજાના ભાગીદાર છે, પ્રતિદ્વંદ્વી નહીં. બંને દેશો એકબીજાના વિકાસ માટે તક સમાન છે, ખતરો નહીં.
2. પરસ્પર સહયોગ અને સફળતા: વિકાસને સાથિયારી ધ્યેય માનીને મૈત્રીપૂર્ણ સંબંધો અને પરસ્પર લાભદાયી સહયોગને આગળ વધારવો જોઈએ.
3. સરહદી શાંતિ અને માન-સન્માન: પરસ્પર સન્માન સાથે સંબંધો અને સરહદ સંબંધિત મુદ્દાઓને સમાંતર રીતે ઉકેલવા જોઈએ અને સરહદી વિસ્તારોમાં શાંતિ જાળવવી જોઈએ.
4. બહુપક્ષીય મંચો પર સહકાર: BRICS ઉપરાંત સંયુક્ત રાષ્ટ્ર (UN), શાંઘાઈ સહયોગ સંગઠન (SCO) અને G-20 જેવા આંતરરાષ્ટ્રીય મંચો પર બંને દેશોએ એકબીજાને સહયોગ આપવો જોઈએ.