દિલ્હી-NCRમાં વાતાવરણ બદલાયું, હવામાન વિભાગે ગાજવીજ-ભારે પવન સાથે વરસાદની આગાહી કરી

દિલ્હી-NCRમાં શનિવારે(10 ઓક્ટોબર) સવારે લોકોએ અહલાદક હવામાન અને ઠંડા પવનનો અનુભવ કર્યો હતો, જેની સાથે વરસાદની ઉચ્ચ શક્યતા દર્શાવવામાં આવી છે. ભારતીય હવામાન વિભાગ (IMD) એ દિલ્હીના કેટલાક વિસ્તારોમાં શનિવાર અને રવિવારે વરસાદની સાથે ગાજવીજ, વીજળીના કડાકા અને પવનની ઝડપ 50 કિમી પ્રતિ કલાક સુધી પહોંચવાની સંભાવના વ્યક્ત કરી છે. હવામાનમાં આવેલો આ ફેરફાર પાડોશી રાજ્યો પર સર્જાયેલા વેસ્ટર્ન ડિસ્ટર્બન્સ અને સાયક્લોનિક સરક્યુલેશનને આભારી છે.

IMD અનુસાર, ઉત્તર પાકિસ્તાન અને તેની આસપાસના વિસ્તારો પર બનેલા વેસ્ટર્ન ડિસ્ટર્બન્સ તેમજ હરિયાણા અને તેને અડીને આવેલા ઉત્તર-પશ્ચિમ ઉત્તર પ્રદેશ પરના અપર-એર સાયક્લોનિક સરક્યુલેશનને કારણે દિલ્હી અને આસપાસના રાજ્યોમાં ગાજવીજ સાથે વરસાદ પડવાની શક્યતા છે. આ દરમિયાન, ધૂળના સ્તરે પણ દિલ્હી-NCRમાં હવાની ગુણવત્તા પર અસર પાડી છે.

શુક્રવારે દિલ્હીની હવાની ગુણવત્તા 'મધ્યમ' શ્રેણીમાં રહી હતી. સેન્ટ્રલ પોલ્યુશન કંટ્રોલ બોર્ડ(CPCB) અનુસાર, સવારે 9.30 વાગ્યે શહેરનો એર ક્વોલિટી ઈન્ડેક્સ(AQI) 173 નોંધાયો હતો, જે 'મધ્યમ' શ્રેણીમાં આવે છે. સફદરજંગ અને લોધી રોડ હવામાન મથકો પર નોંધાયેલું ન્યૂનતમ તાપમાન અનુક્રમે 25.2 ડિગ્રી સેલ્સિયસ અને 24.2 ડિગ્રી સેલ્સિયસ હતું, જે બંને સ્થળોએ સામાન્ય કરતાં 4.2 ડિગ્રી વધુ હતું.

આયાનાગરમાં ન્યૂનતમ તાપમાન 24.7 ડિગ્રી સેલ્સિયસ નોંધાયું હતું, જે સામાન્ય કરતાં 3.8 ડિગ્રી વધુ હતું. રિજ અને પાલમ હવામાન મથકો પર ન્યૂનતમ તાપમાન અનુક્રમે 23.8 ડિગ્રી સેલ્સિયસ અને 22.7 ડિગ્રી સેલ્સિયસ નોંધાયું હતું. આ દરમિયાન, દિલ્હી પોલ્યુશન કંટ્રોલ કમિટી(DPCC) એ બાંધકામની પ્રવૃત્તિઓમાંથી ઉડતી ધૂળના ઉત્સર્જનને નિયંત્રિત કરવાના પ્રયાસો તેજ કર્યા છે. તે દેશની રાજધાનીમાં ચાલી રહેલા સરકારી અને ખાનગી પ્રોજેક્ટ સાઇટ્સ પર નિયમિત અને સરપ્રાઇઝ તપાસ કરી રહી છે.

આ તપાસ દરમિયાન, કેટલીક સાઇટ્સ પર નિયત ધૂળ-નિયંત્રણ નિયમોનું ઉલ્લંઘન જણાતાં સંબંધિત પ્રોજેક્ટ એજન્સીઓ (જેમાં કેટલીક સરકારી સંસ્થાઓ પણ સામેલ છે) ને કારણ દર્શાવો નોટિસ ફટકારવામાં આવી છે. દિલ્હીના મુખ્યમંત્રી રેખા ગુપ્તાએ શુક્રવારે(9 ઓક્ટોબર) જણાવ્યું હતું કે, પ્રદૂષણ નિયંત્રણ નિયમોનું કોઈ પણ અપવાદ વગર પાલન થવું જોઈએ. તેમણે કહ્યું કે સરકારની પ્રાથમિકતા એ સુનિશ્ચિત કરવાની છે કે તમામ બાંધકામ પ્રોજેક્ટ્સ નિર્ધારિત પ્રદૂષણ-નિયંત્રણના પગલાંનો અસરકારક અમલ કરે.

ગુપ્તાએ ચેતવણી આપી હતી કે નિયમોનું ઉલ્લંઘન કરતી એજન્સીઓ સામે કડક કાર્યવાહી કરવામાં આવશે. તેમણે ભારપૂર્વક જણાવ્યું હતું કે, કોઈ પણ સરકારી વિભાગ, બાંધકામ એજન્સી, કોન્ટ્રાક્ટર કે ખાનગી કંપની કાયદાથી ઉપર નથી, અને સરકારી તેમજ ખાનગી બાંધકામ પ્રોજેક્ટ્સ બંને માટે એકસમાન પ્રદૂષણ-નિયંત્રણ ધોરણો લાગુ પડે છે.