દોહા ડાયમંડ લીગમાં સિલ્વર મેડલ મેળવનાર નીરજ ચોપડાને PMએ આપ્યા અભિનંદન

નીરજ ચોપરાને દોહા ડાયમંડ લીગ 2025માં તેમના શાનદાર ભાલા ફેંક બદલ પ્રધાનમંત્રી નરેન્દ્ર મોદીએ અભિનંદન પાઠવ્યા છે. તેમણે ચોપડાના વ્યક્તિગત શ્રેષ્ઠ ભાલા ફેંકને 'શાનદાર સિદ્ધિ' ગણાવી પ્રધાનમંત્રીના સત્તાવાર 'X' હેન્ડલ પરથી અભિનંદન સંદેશ મોકલવામાં આવ્યો છે. ભારતના 'ગોલ્ડન બોય' નીરજ ચોપરાએ શુક્રવારે દોહા ડાયમંડ લીગમાં પહેલીવાર 90 મીટરથી વધુ ભાલા ફેંકીને ઈતિહાસ રચ્યો. તેણે ફાઈનલમાં પોતાના ત્રીજા પ્રયાસમાં 90.23 મીટર ભાલા ફેંકીને પોતાનો શ્રેષ્ઠ દેખાવ કર્યો. અગાઉ, તેમનો શ્રેષ્ઠ થ્રો 89.94 મીટર હતો, જે તેમણે 30 જૂન, 2022ના રોજ સ્ટોકહોમ ડાયમંડ લીગમાં ફેંક્યો હતો.

શ્રેષ્ઠ થ્રો હોવા છતાં, નીરજ ચોપરાને સિલ્વર મેડલથી સંતોષ માનવો પડ્યો. જર્મનીના વેબર જુલિયને 91.06 મીટર સાથે ગોલ્ડ મેડલ જીત્યો. 6માંથી 5મા થ્રો સુધી નીરજ નંબર વન પર હતો, પરંતુ છઠ્ઠા અને છેલ્લા થ્રોમાં જુલિયન તેને પાછળ છોડી ગયો. 90 મીટરનું અંતર માત્ર એક આંકડો ન હતો પણ નીરજ ચોપરા માટે તે એક પડકાર બની ગયું હતું. તે ઘણી વખત આ આંકડાની ખૂબ નજીક આવ્યો, પરંતુ દરેક વખતે તે 88 કે 89 મીટર સુધી મર્યાદિત રહ્યો.

જ્યારે નીરજ ચોપરાએ ત્રીજા પ્રયાસમાં આ ઐતિહાસિક થ્રો કર્યો, ત્યારે આખું મેદાન ખુશીથી ગુંજી ઉઠ્યું. આ પ્રદર્શનમાં તેમના નવા કોચ જાન ઝેલેઝનીની ભૂમિકા પણ મહત્વપૂર્ણ માનવામાં આવી રહી છે. તેમણે તાજેતરમાં જર્મન કોચ ડૉ. ક્લાઉસ બાર્ટોનીટ્ઝને હટાવીને ત્રણ વખતના ઓલિમ્પિક સુવર્ણ ચંદ્રક વિજેતા ઝેલેઝની (ચેક રિપબ્લિક) ને પોતાના કોચ તરીકે નિયુક્ત કર્યા છે.

આ થ્રો સાથે, નીરજ હવે 90 મીટર ક્લબમાં જોડાઈ ગયો છે, જેમાં પહેલાથી જ પાકિસ્તાનના ઓલિમ્પિક સુવર્ણ ચંદ્રક વિજેતા અરશદ નદીમ જેવા ખેલાડીઓનો સમાવેશ થાય છે. આ સિદ્ધિ માત્ર નીરજ માટે એક રેકોર્ડ નથી પણ એક મોટી વ્યક્તિગત જીત પણ છે.

દોહામાં નીરજની આ સિઝનની પહેલી મોટી ઇવેન્ટ હતી, જ્યાં તેણે બે વખતના વિશ્વ ચેમ્પિયન અને 2024 ઓલિમ્પિક બ્રોન્ઝ મેડલ વિજેતા ગ્રેનાડાના પીટર્સ એન્ડરસન, ચેકિયાના જેકબ વાડલેજ (2024 દોહા વિજેતા), જર્મનીના વેબર જુલિયન અને મેક્સ ડેહનિંગ, કેન્યાના જુલિયસ યેગો અને જાપાનના રોડરિક જંકી ડીન જેવા દિગ્ગજ ખેલાડીઓનો સામનો કર્યો હતો.