પર્યાવરણ અને આબોહવા પર સસ્ટેનેબલ વર્કિંગ ગ્રુપની ત્રીજી બેઠક મુંબઈમાં શરૂ 

ભારતની G-20 પ્રેસિડેન્સી હેઠળ પર્યાવરણ અને આબોહવા પરિવર્તન પર કાર્યકારી જૂથની ત્રીજી બેઠક આજે મુંબઈમાં એક વિશાળ બીચ સફાઈ સાથે શરૂ થઈ. મહારાષ્ટ્રના રાજ્યપાલ રમેશ બૈસ, કેન્દ્રીય પર્યાવરણ, વન અને આબોહવા પરિવર્તન રાજ્ય પ્રધાન અશ્વિની કુમાર ચૌબે અને મુખ્ય પ્રધાન એકનાથ શિંદે તેમજ G-20 બેઠકમાં ભાગ લેનારા વિવિધ દેશોના પ્રતિનિધિમંડળના સભ્યોએ બીચ ક્લીન-અપ ડ્રાઇવમાં ભાગ લીધો હતો. કાર્યક્રમની શરૂઆત પર્યાવરણ જાળવણીના શપથ લઈને કરવામાં આવી હતી. બીચ ક્લીનઅપ ઝુંબેશનો ઉદ્દેશ્ય લોકોમાં બીચ અને દરિયાની સુરક્ષા અંગે જાગૃતિ ફેલાવવાનો છે.

આ ઉપરાંત ઓશન ટ્વેન્ટી ડાયલોગ કાર્યક્રમનું આયોજન કરવામાં આવ્યું છે. તે સમુદ્રી અર્થવ્યવસ્થાના વિવિધ પાસાઓ પર ચર્ચા કરશે. દિવસનું પ્રથમ સત્ર વિજ્ઞાન, ટેક્નોલોજી અને ઈનોવેશન ફોર ધ ઓશન ઈકોનોમી પર છે. ત્યારપછી સમુદ્રી અર્થવ્યવસ્થા માટે નીતિ, સરકારી સહકાર અને નાણાંકીય વ્યવસ્થા ગોઠવવા સંબંધિત મુદ્દાઓ પર ચર્ચા કરવામાં આવશે.