પહેલગામનાં આતંકવાદીઓના લાગ્યા પોસ્ટર, 20 લાખનું ઈનામ કરાયું જાહેર

જમ્મુ અને કાશ્મીરના પહેલગામમાં 22 એપ્રિલે 26 પ્રવાસીઓની ક્રૂર હત્યા કરનારા આતંકવાદીઓના પોસ્ટર બહાર પાડવામાં આવ્યા છે. શોપિયાન જિલ્લાના વિવિધ વિસ્તારોમાં આતંકવાદીઓના પોસ્ટર લગાવવામાં આવ્યા છે, અને તેમના વિશે માહિતી આપનારને 20 લાખ ઈનામ આપવાની જાહેરાત કરવામાં આવી છે.

ઉપરાંત, પોલીસે કહ્યું છે કે પહેલગામ આતંકવાદી હુમલામાં સંડોવાયેલા આરોપીઓ વિશે માહિતી આપનારાઓની ઓળખ ગુપ્ત રાખવામાં આવશે. જમ્મુ અને કાશ્મીર વહીવટીતંત્રે 25 એપ્રિલે પહેલગામ હુમલા કેસમાં મોટી કાર્યવાહી કરી અને ત્રાલ (પુલવામા) અને બિજબેહરા (અનંતનાગ)માં 2 આતંકવાદીઓના ઘર તોડી પાડ્યા.

પુલવામા જિલ્લાના ત્રાલમાં આસિફ શેખ અને બિજબેહરામાં આદિલ થોકરના ઘર વિસ્ફોટોથી જમીનદોસ્ત થઈ ગયા હતા. આ આતંકવાદીઓ 22 એપ્રિલના રોજ પહેલગામના બૈસરનમાં થયેલા હુમલામાં સામેલ હોવાની શંકા છે. અનંતનાગ જિલ્લાનો રહેવાસી થોકર 22 એપ્રિલના પહેલગામ હત્યાકાંડનો મુખ્ય આરોપી છે. તે 2018 માં પાકિસ્તાન ગયો હોવાનું કહેવાય છે, જ્યાં તેણે ગયા વર્ષે જમ્મુ અને કાશ્મીર પરત ફરતા પહેલા આતંકવાદી તાલીમ લીધી હતી. પોલીસનું માનવું છે કે તે પાકિસ્તાની આતંકવાદીઓ માટે સ્થાનિક માર્ગદર્શક તરીકે કામ કરતો હતો.

આ ઉપરાંત, પુલવામાના રહેવાસી આસિફ શેખ પર આ હુમલામાં સંડોવણી હોવાની શંકા છે. પોલીસે ઠોકર અને બે અન્ય આતંકવાદીઓના સ્કેચ જાહેર કર્યા હતા, જેઓ પહેલગામ હુમલામાં સામેલ હોવાનું કહેવાય છે. તમને જણાવી દઈએ કે પોલીસે પહેલગામની બૈસરન ખીણમાં પ્રવાસીઓ પર હુમલો કરનારા ત્રણ આતંકવાદીઓના પોસ્ટર (સ્કેચ) જાહેર કર્યા હતા. ઉપરાંત, દરેક આતંકવાદી વિશે માહિતી આપનારા માટે 20 લાખ રૂપિયાનું ઇનામ જાહેર કરવામાં આવ્યું હતું.

ઉલ્લેખનીય છે કે પહેલગામ આતંકવાદી હુમલા બાદ ભારતીય સેનાએ ઓપરેશન સિંદૂર શરૂ કર્યું હતું અને પાકિસ્તાનમાં આતંકવાદી ઠેકાણાઓનો નાશ કર્યો હતો. આ કાર્યવાહીમાં ઘણા આતંકવાદીઓ માર્યા ગયા.