પીએમ મોદી આજે યુએઈની મુલાકાત લેશે, ઉર્જા અને વ્યૂહાત્મક સંબંધો પર ધ્યાન કેન્દ્રિત કરશે

પ્રધાનમંત્રી નરેન્દ્ર મોદી શુક્રવારે સંયુક્ત આરબ અમીરાત (યુએઈ) ની સત્તાવાર મુલાકાતે જશે. આ મુલાકાતનો મુખ્ય ઉદ્દેશ્ય ભારત અને યુએઈ વચ્ચે વ્યાપક વ્યૂહાત્મક ભાગીદારીને વધુ મજબૂત બનાવવાનો છે.

તેમની મુલાકાત દરમિયાન, પ્રધાનમંત્રી મોદી યુએઈના રાષ્ટ્રપતિ શેખ મોહમ્મદ બિન ઝાયેદ અલ નાહ્યાનને મળશે. બંને નેતાઓ પરસ્પર સંબંધો, ઉર્જા સહયોગ અને બંને દેશો વચ્ચે ભાગીદારીને વધુ આગળ વધારવાના માર્ગો પર ચર્ચા કરશે.

વિદેશ મંત્રાલયે જણાવ્યું હતું કે, "બંને નેતાઓ દ્વિપક્ષીય 'વ્યાપક વ્યૂહાત્મક ભાગીદારી'ને વધુ આગળ વધારવાના માર્ગો પર પણ ચર્ચા કરશે, જે મજબૂત રાજકીય, સાંસ્કૃતિક, આર્થિક અને લોકો-થી-લોકોના સંબંધો પર આધારિત છે. આ મુલાકાત બંને દેશો વચ્ચે મહત્વપૂર્ણ વેપાર અને રોકાણ સંબંધોને પ્રોત્સાહન આપવામાં મદદ કરશે."

સત્તાવાર સૂત્રોના જણાવ્યા અનુસાર, વડા પ્રધાન મોદીની મુલાકાત દરમિયાન ઉર્જા સુરક્ષા એક મુખ્ય મુદ્દો રહેશે. મુલાકાત દરમિયાન એલપીજી અને વ્યૂહાત્મક પેટ્રોલિયમ સંગ્રહ સંબંધિત બે મહત્વપૂર્ણ એમઓયુ પર હસ્તાક્ષર થવાની અપેક્ષા છે. વિદેશ મંત્રાલય અનુસાર, UAE ભારતનો ત્રીજો સૌથી મોટો વેપારી ભાગીદાર છે. UAEમાં 4.5 મિલિયનથી વધુ ભારતીયો રહે છે, તેથી આ મુલાકાતમાં ત્યાં રહેતા ભારતીયોના હિતો અને સુવિધાઓ પર પણ ચર્ચા કરવામાં આવશે.

વિદેશ મંત્રાલયમાં સચિવ (પશ્ચિમ) સિબી જ્યોર્જે મીડિયાને માહિતી આપતા જણાવ્યું હતું કે  પ્રધાનમંત્રી મોદી છ દિવસની વિદેશ યાત્રા પર જશે. આ મુલાકાત દરમિયાન, તેઓ UAE, નેધરલેન્ડ, સ્વીડન, નોર્વે અને ઇટાલીની મુલાકાત લેશે. તેમના પ્રવાસના બીજા તબક્કામાં, પ્રધાનમંત્રી નેધરલેન્ડની મુલાકાત લેશે. 2017 પછી પ્રધાનમંત્રીની નેધરલેન્ડની આ બીજી મુલાકાત હશે. જ્યોર્જે જણાવ્યું હતું કે આ મુલાકાત દરમિયાન, તેઓ નેધરલેન્ડના રાજા વિલેમ-એલેક્ઝાન્ડર અને રાણી મેક્સિમાને મળશે, તેમજ પ્રધાનમંત્રી રોબ જેટન સાથે વાતચીત કરશે.

આ પછી,પ્રધાનમંત્રી મોદી સ્વીડનના ગોથેનબર્ગ જશે, જ્યાં તેઓ સ્વીડનના પ્રધાનમંત્રી ઉલ્ફ ક્રિસ્ટરસન સાથે દ્વિપક્ષીય વાતચીત કરશે. બંને દેશો વેપાર અને સહયોગ વધારવા માટે નવી તકો પર ચર્ચા કરશે.

પ્રધાનમંત્રી મોદી અને સ્વીડિશ પ્રધાનમંત્રી યુરોપિયન રાઉન્ડટેબલ ફોર ઇન્ડસ્ટ્રીને પણ સંબોધિત કરશે, જે એક મુખ્ય યુરોપિયન બિઝનેસ ફોરમ છે. યુરોપિયન કમિશનના પ્રમુખ ઉર્સુલા વોન ડેર લેયેન પણ આ કાર્યક્રમમાં હાજર રહેશે.

પ્રધાનમંત્રી મોદી સોમવારે તેમની મુલાકાતના ચોથા તબક્કા માટે નોર્વે પહોંચશે. ત્યાં તેઓ ત્રીજા ભારત-નોર્ડિક સમિટમાં ભાગ લેશે અને અનેક દ્વિપક્ષીય બેઠકો કરશે.

તેમની મુલાકાતના અંતિમ તબક્કામાં, પ્રધાનમંત્રી મંગળવારે ઇટાલી જશે. ઇટાલીમાં, તેઓ રાષ્ટ્રપતિ સર્જિયો મેટારેલાને મળશે અને વડા પ્રધાન જ્યોર્જિયો મેલોની સાથે વાતચીત કરશે.