પ્રધાનમંત્રી તમિલનાડુમાં આજે 17 હજાર 300 કરોડની વિકાસ પરિયોજનાનું ઉદ્ધાટન અને શિલાન્યાસ કરશે

પ્રધાનમંત્રી નરેન્દ્ર મોદીના તમિલનાડુ પ્રવાસનો આજે બીજો દિવસ છે. પ્રધાનમંત્રી નરેન્દ્ર મોદી આજે તમિલનાડુના તુતીકોરીનમાં રૂ. 17,300 કરોડના પ્રોજેક્ટનું લોકાર્પણ કરશે. આ પ્રોજેક્ટ્સમાં દેશનું પ્રથમ હાઇડ્રોજન હબ પોર્ટ, અનેક રાષ્ટ્રીય ધોરીમાર્ગોને ચાર-માર્ગીય અને દ્વિ-માર્ગીકરણ અને રેલ્વે લાઇનને બમણી કરવાનો સમાવેશ થાય છે.

પ્રધાનમંત્રી ગ્રીન બોટ ઇનિશિયેટિવ હેઠળ ભારતનું પ્રથમ સ્વદેશી ગ્રીન હાઇડ્રોજન ફ્યુઅલ સેલ ઇનલેન્ડ વોટરવેઝ શિપ પણ લોન્ચ કરશે. આ જહાજ કોચીન શિપયાર્ડમાં બનાવવામાં આવ્યું છે. સ્વચ્છ ઉર્જા ઉકેલો અપનાવવા અને શૂન્ય કાર્બન ઉત્સર્જન તરફ દેશની પ્રતિબદ્ધતાઓને પૂર્ણ કરવાની દિશામાં આ એક અગ્રણી પગલું છે. પ્રધાનમંત્રી કાર્યક્રમ દરમિયાન દસ રાજ્યો/કેન્દ્રશાસિત પ્રદેશોમાં 75 દીવાદાંડીઓમાં રાષ્ટ્રને પ્રવાસી સુવિધાઓ પણ સમર્પિત કરશે.

કાર્યક્રમ દરમિયાન,પ્રધાનમંત્રી નરેન્દ્ર મોદી વાંચી મણિયાચ્ચી-નાગરકોઇલ રેલ્વે લાઇનના ડબલીંગના રેલ્વે પ્રોજેક્ટનું ઉદ્ઘાટન કરશે. આ રેલ્વે લાઇનમાં વાંચી મણિયાચ્ચી-તિરુનેલવેલી વિભાગ અને મેલાપ્પાલયમ-અરલવયામોલી વિભાગનો સમાવેશ થાય છે. આશરે રૂ. 1,477 કરોડના ખર્ચે વિકસાવવામાં આવેલ આ ડબલીંગ પ્રોજેક્ટ કન્યાકુમારી, નાગરકોઈલ અને તિરુનેલવેલીથી ચેન્નાઈ તરફ જતી ટ્રેનોના પ્રવાસના સમયને ઘટાડવામાં મદદ કરશે. આ સાથેજ તીરુનેરવેલી ખાતે વિશાળ જનસભાને સંબોધિત કરશે. 

પ્રધાનમંત્રી તમિલનાડુમાં લગભગ રૂ. 4,586 કરોડના કુલ ખર્ચે વિકસિત ચાર રોડ પ્રોજેક્ટ પણ સમર્પિત કરશે. આ પ્રોજેક્ટ્સમાં NH-844ના જિત્તંદહલ્લી-ધરમપુરી સેક્શનને ફોર-લેનિંગ, NH-81ના મીનસુરત્તી-ચિદમ્બરમ સેક્શનને બે-લેનિંગ, NH-83ના ઓડનચત્રમ-મદાથુકુલમ સેક્શનને ફોર-લેનિંગ અને NH-83ના નાગપટ્ટિનમ સેક્શનને પહોળું કરવાનો સમાવેશ થાય છે. તંજાવુર વિભાગના દ્વિ-માર્ગીકરણનો સમાવેશ થાય છે. આ પ્રોજેક્ટ્સનો હેતુ કનેક્ટિવિટી સુધારવા, મુસાફરીનો સમય ઘટાડવા, સામાજિક-આર્થિક વિકાસને વધારવા અને પ્રદેશમાં તીર્થયાત્રાઓને સરળ બનાવવાનો છે.