પ્રધાનમંત્રી નરેન્દ્ર મોદીને મળવા PM આવાસ પહોંચી ટીમ ઈન્ડિયા

ટીમ ઈન્ડિયા દિલ્હીમાં PM મોદીના નિવાસસ્થાને પહોંચી.T20 વર્લ્ડ કપ જીતીને ભારત પરત ફરેલી ભારતીય ક્રિકેટ ટીમ ગુરુવારે પ્રધાનમંત્રી નરેન્દ્ર મોદીના નિવાસસ્થાને પહોંચી હતી. ટીમ ગુરુવારે વહેલી સવારે બાર્બાડોસથી પરત ફરી હતી. પીએમ મોદીએ ભારતીય ટીમને નાસ્તા માટે આમંત્રણ આપ્યું છે. પ્રધાનમંત્રીએ ગયા શનિવારે ફાઈનલ બાદ ફોન પર ભારતીય ટીમને વર્લ્ડ કપ માટે અભિનંદન પાઠવ્યા હતા. પીએમ મોદીને મળ્યા પછી, ટીમ મુંબઈ માટે રવાના થશે, જ્યાં BCCIએ નરીમાન પોઈન્ટથી વાનખેડે સુધી 1 કિલોમીટરની વિજય પરેડની વ્યવસ્થા કરી છે, જેથી ચાહકો વર્લ્ડ કપ ટ્રોફી સાથે તેમના સ્ટાર્સની નજીકની ઝલક મેળવી શકે. આ પછી, વિજેતા ટીમને પ્રતિષ્ઠિત વાનખેડે સ્ટેડિયમમાં પણ સન્માનિત કરવામાં આવશે. ભારતીય ટીમ ગુરુવારે વહેલી સવારે ઈન્દિરા ગાંધી ઈન્ટરનેશનલ એરપોર્ટ પહોંચી હતી. રોહિત શર્માની આગેવાની હેઠળની ટીમે શનિવારે કેન્સિંગ્ટન ઓવલ ખાતે રમાયેલી રોમાંચક ફાઇનલમાં દક્ષિણ આફ્રિકાને સાત રનથી હરાવીને બીજી વખત T20 વર્લ્ડ કપ જીત્યો હતો. પરંતુ હરિકેન બેરીલને કારણે તેમના ઘરે પરત ફરવામાં વિલંબ થયો હતો. બીસીસીઆઈએ ટીમ માટે ખાસ ચાર્ટર્ડ એર ઈન્ડિયા ફ્લાઈટની વ્યવસ્થા કરી હતી. નેવાર્ક, ન્યુ જર્સીની બોઇંગ 777 ફ્લાઇટ બુધવારે વહેલી સવારે બ્રિજટાઉનમાં ગ્રાન્ટલી એડમ્સ ઇન્ટરનેશનલ એરપોર્ટ પર આવી હતી. ત્યારબાદ વિશેષ ફ્લાઇટ સ્થાનિક સમય મુજબ સવારે 4:50 વાગ્યે બ્રિજટાઉનથી રવાના થઈ, જેમાં ભારતીય ટીમના સપોર્ટ સ્ટાફ, ખેલાડીઓના પરિવારજનો, બીસીસીઆઈના અધિકારીઓ અને 22 પ્રવાસી મીડિયા પર્સન્સ હતા. નવી દિલ્હીમાં ઉતર્યા પછી, T20 વર્લ્ડ કપ વિજેતા ટીમ ITC મૌર્ય હોટેલ પહોંચી જ્યાં તેમનું ઉષ્માભર્યું સ્વાગત કરવામાં આવ્યું.