પ્રધાનમંત્રી મોદીએ નવી દિલ્હીમાં ભારતની સર્વોચ્ચ અદાલતની હિરક જયંતી સમારંભનું ઉદ્ઘાટન કર્યું

પ્રધાનમંત્રી નરેન્દ્ર મોદીએ નવી દિલ્હી ખાતે ભારતની સર્વોચ્ચ અદાલતના હિરક જયંતી સમારંભનું ઉદઘાટન કર્યુ છે. તેઓ ભારતીય નાગરિક કેન્દ્રિત અનેક પ્રૌદ્યોગિક પહેલને શરૂ કરાવશે. જેમાં ડિજીટલ સુપ્રિમ કોર્ટ રીપોર્ટ, ડિજીટલ કોર્ટ 2.0 અને સુપ્રિમ કોર્ટની નવી વેબસાઇટનો સમાવેશ કરાયો છે. 

આ પ્રસંગે સંબોધન કરતા પ્રધાનમંત્રી નરેન્દ્ર મોદીએ કહ્યું કે, સુપ્રીમ કોર્ટે ભારતની ગતિશીલ લોકશાહીને મજબૂત બનાવી છે. રવિવારે દિલ્હીમાં ભારતની સર્વોચ્ચ અદાલતની ડાયમંડ જ્યુબિલી ઉજવણીનું ઉદ્ઘાટન કરતાં શ્રી મોદીએ જણાવ્યું હતું કે, આજે ભારતની આર્થિક નીતિઓ આવતીકાલના ઉજ્જવળ ભારતનો આધાર બનશે. તેમણે કહ્યું કે, ન્યાયની સરળતા પૂરી પાડવામાં ટેકનોલોજી મોટી ભૂમિકા ભજવી રહી છે. તેમણે ટિપ્પણી કરી હતી કે સરકાર વર્તમાન પરિસ્થિતિ અને શ્રેષ્ઠ પ્રથાઓ સાથે સંરેખિત કરવા કાયદાના આધુનિકીકરણ પર સક્રિયપણે કામ કરી રહી છે. લોકોની સારી સમજણ માટે સરળ ભાષામાં કાયદાનો મુસદ્દો તૈયાર કરવાના તેમના સૂચનોને યાદ કરતાં શ્રી મોદીએ કોર્ટના ચુકાદાઓ અને આદેશોનો મુસદ્દો તૈયાર કરવા માટે સમાન અભિગમ સૂચવ્યો.

તેમણે વધુમાં જણાવ્યુ હતુ કે,  મજબૂત ન્યાયતંત્ર એ વિકસિત ભારતનો મુખ્ય પાયો છે. તેમણે જણાવ્યું કે સરકારે સુપ્રીમ કોર્ટના નવા બિલ્ડિંગ માટે 800 કરોડ રૂપિયાની મંજૂરી આપી છે.
 
દેશમાં સમગ્ર ન્યાય પ્રણાલીનું સંચાલન અને માર્ગદર્શન સુપ્રીમ કોર્ટ દ્વારા કરવામાં આવે છે તેની નોંધ લેતા, વડા પ્રધાને સુપ્રીમ કોર્ટને છેવાડાના ભાગો સુધી સુલભ બનાવવાની સરકારની પ્રાથમિકતા પર ભાર મૂક્યો હતો. તેમણે ઈ-કોર્ટ્સ મિશન પ્રોજેક્ટના ત્રીજા તબક્કાને સ્વીકૃતિ આપવાનો ઉલ્લેખ કર્યો. તેમણે માહિતી આપી હતી કે ત્રીજા તબક્કા માટે ભંડોળની ફાળવણી બીજા તબક્કા કરતાં ચાર ગણી વધારે કરવામાં આવી છે. વડા પ્રધાન મોદીએ એ વાતનો આનંદ વ્યક્ત કર્યો કે દેશની તમામ અદાલતોના ડિજિટલાઇઝેશન પર ભારતના મુખ્ય ન્યાયાધીશ પોતે દેખરેખ રાખી રહ્યા છે અને તેમના પ્રયાસો માટે તેમને અભિનંદન આપ્યા.
       
અદાલતોના ભૌતિક માળખામાં સુધારો કરવા માટે સરકારની પ્રતિબદ્ધતાનો પુનરોચ્ચાર કરતા, વડા પ્રધાને માહિતી આપી હતી કે 2014 પછી, આ હેતુ માટે 7,000 કરોડ રૂપિયાથી વધુનું વિતરણ કરવામાં આવ્યું છે.
 
આ પ્રસંગે પ્રધાનમંત્રીએ નાગરિક-કેન્દ્રિત માહિતી અને ટેક્નોલોજી પહેલ શરૂ કરી જેમાં ડિજિટલ સુપ્રીમ કોર્ટ રિપોર્ટ્સ (ડિજી એસસીઆર), ડિજિટલ કોર્ટ 2.0 અને સુપ્રીમ કોર્ટની નવી વેબસાઇટનો સમાવેશ થાય છે.
 
આ પ્રસંગે બોલતા ભારતના મુખ્ય ન્યાયાધીશ ડીવાય ચંદ્રચુડે કહ્યું હતું કે હવે લોકો પાસે એક બટનના ક્લિક પર કેસ દાખલ કરવાની સુવિધા છે. તેમણે જણાવ્યું હતું કે સુપ્રીમ કોર્ટના ઈ-ફાઈલિંગ પ્લેટફોર્મનું અપગ્રેડેડ વર્ઝન ગયા વર્ષે મેમાં લોન્ચ કરવામાં આવ્યું હતું જે ઘણી બધી સુધારેલી સુવિધાઓ પ્રદાન કરે છે જેણે 24x7 કેસ ફાઈલ કરવાનું સરળ, ઝડપી અને અનુકૂળ બનાવ્યું છે. તેમણે ઉમેર્યું હતું કે અત્યાર સુધીમાં લગભગ એક લાખ 28 હજાર ઈ-ફાઈલિંગ કરવામાં આવ્યા છે.